खास प्रतिनिधी | गोपनीय खबऱ्या
सांगली शहरातील उपनगरात राहणार्या एका शाळकरी मुलीचा एकतर्फी प्रेमातून विनयभंग करून घराच्या दरवाजावर लाथा मारून तिला व आईला शिवीगाळ केल्याचा प्रकार घडला. याबाबत पीडितेच्या आईने संजयनगर पोलिसांत फिर्याद दिली आहे. त्यानुसार आशुतोष दीपक मोहिते (रा. अहिल्यानगर) याच्याविरुद्ध ‘पोक्सो’अंतर्गत गुन्हा दाखल झाला आहे.
याबाबत माहिती अशी की, पीडित मुलगी शहरातील एका उपनगरात राहते. गेल्या काही दिवसापासून संशयित आशुतोष तिचा पाठलाग करत होता. दि. 22 रोजी सायंकाळी सातच्या सुमारास पीडिता सायकल घेऊन दूध आणण्यासाठी निघाली होती. ती घराबाहेर येताच तिला आशुतोष दिसला. तिने घाबरून सायकल जागेवरच लावून घराचा दरवाजा बंद करून घेतला. तोपर्यंत आशुतोष तिथे आला. त्याने दारातूनच पीडित मुलीला, ‘मी तुला सोडणार नाही. माझे तुझ्यावर प्रेम आहे. मला तुझा मोबाईल नंबर दे, नाही तर मी जीव देईन’, अशी धमकी दिली. तिने दरवाजा बंद केल्यामुळे आशुतोषने दरवाजावर जोरजोरात लाथा मारल्या.
दरवाजा न उघडल्याने पीडितेला व तिच्या आईला शिवीगाळ करून तो तेथून निघून गेला. याबाबत पीडितेच्या आईने शुक्रवारी सायंकाळी संजयनगर पोलिस ठाण्यात फिर्याद दिली आहे. आशुतोष याच्यावर ‘पोक्सो’अंतर्गत गुन्हा दाखल झाला आहे.
