खास प्रतिनिधी | गोपनीय खबऱ्या
शिंगणापूर (ता. जत) येथे महसूल सेविकेस मारहाण केल्याप्रकरणी तिघांविरुद्ध जत पोलिसात सरकारी कामात अडथळा आणल्याचा गुन्हा दाखल झाला आहे. याप्रकरणी पोलिसांनी दादासाहेब लवटे याला अटक केली आहे, मात्र उर्वरित दोन संशयित महिलांना अटक करा, अन्यथा महसूल सेवक काम बंद आंदोलन करतील, असा इशारा देणारे निवेदन संघटनेतर्फे तहसीलदार प्रवीण धानोरकर यांना देण्यात आले.
यावेळी संघटनेचे अध्यक्ष सुभाष कोळी, बाळासाहेब चव्हाण, विनोद कोळी, चिंतामणी साळे, सुहास पारसे, चनाप्पा भोसले, मलाप्पा कोळी, मानतेश नाईक, शहानाज भालदार, रमेश कुंभार आदी उपस्थित होते.
निवेदनात म्हटले आहे की, शनिवारी कुडनूर सजाचे तलाठी प्रकाश पाटील यांच्या तोंडी आदेशाने महसूल सेविका यल्लूबाई नाईक या शिंगणापूर येथील पीक पाहणीस गेल्या होत्या. यावेळी दादासाहेब लवटे व त्यांच्या पत्नीने त्यांच्याकडे ऊस पिकाऐवजी द्राक्षपीक नोंद करा म्हणून आग्रह धरला. नकार दिल्याने त्यांना अमानुष मारहाण केली. याबाबत जत पोलिसात तिघांवर गुन्हा दाखल आहे.
