मिरज प्रतिनिधी | गोपनीय खबऱ्या
तालुक्यातील म्हैसाळ गावात घरगुती गॅस सिलेंडरचा स्फोट झाल्याची धक्कादायक घटना आज सोमवारी दि. ०५ रोजी पहाटे साडेपाच वाजण्याच्या सुमारास घडली. घटनास्थळी डीवायएसपी प्रणिल गिल्डा, निरीक्षक अजित सिद यांच्यासह अधिकारी व कर्मचाऱ्यांनी तात्काळ भेट देऊन पाहणी केली.
सदरील घटनेत सूर्यकांत हंबीरराव वनमोरे (वय ४०), मयुरी सूर्यकांत वनमोरे (वय ३६), प्रिया सूर्यकांत वनमोरे (वय १५ ) हे जखमी झाले असून त्यांना उपचारार्थ प्रथमतः म्हैसाळ येथील प्राथमिक आरोग्य केंद्र येथे नेण्यात आले. त्यानंतर सद्य परिस्थितीत त्यांची प्रकृती चिंताजनक असल्याने त्यांच्यावर सांगली येथील वसंतरावदादा पाटील शासकीय रुग्णालय येथे उपचार सुरू आहेत.
यामध्ये संपूर्ण घरातील खिडकी, छत व इतर संसारोपयोगी साहित्य जळून, तुटून, फुटून मोठ्या प्रमाणावर नुकसान झाले आहे. दरम्यान गॅस सिलेंडरचा स्फोट होण्याचे नेमकं कारण समजू शकले नाही. याबाबत अधिक तपास मिरज ग्रामीण पोलीस करीत आहेत.
