सांगली प्रतिनिधी | गोपनीय खबऱ्या
एक गुंठा शेत जमीन क्षेत्राची सातबारा उताऱ्यावर नोंदणी करण्यासाठी पन्नास हजार रुपये लाचेची मागणी केल्याप्रकरणी कर्नाळच्या (ता. मिरज) तलाठ्यासह दोघांना लाचलुचपत प्रतिबंधक विभागाने अटक केली.
तलाठी तानाजी पांडुरंग फराकटे (४९, रा. फ्लॅट नं. ५, हिरा अपार्टमेंट, एसटी कॉलनी, विश्रामबाग) व एजंट गणेश विश्वास कांबळे (३०, रा. पद्माळे, ता. मिरज) अशी दोघांची नावे आहेत.
अधिक माहिती अशी की, यातील तक्रारदार यांनी कर्नाळ येथे एक गुंठा जमीन खरेदी केली होती. याची सात बारा उताऱ्यावर नोंदणी करण्यासाठी तलाठी फराकटे यांची भेट घेतली. तेव्हा फराकटे याने ५० हजार रुपयांची मागणी केली. याबाबतची तक्रारदार यांनी लाचलुचपत प्रतिबंधक विभागाकडे २८ जानेवारी २०२५ रोजी तक्रार दिली.
तक्रारीनंतर लाचलुचपत प्रतिबंधक विभागाने २९ व ३० जानेवारी रोजी पडताळणी केली. तेव्हा तलाठी फराकटे याने पंचाच्या समक्ष ५० हजार रुपये लाच मागितली, तसेच तडजोडीअंती ४० हजारांची मागणी करून एजंट गणेश कांबळे याला जाऊन भेटण्यास सांगितले, असे स्पष्ट झाले.
शिवाय पडताळणी दरम्यान एजंट कांबळे यानेही तक्रारदार यांच्या कामासाठी ५० हजार रुपये मागितले आणि रक्कम कमी करण्याची विनंती केली असता, त्यानेही तलाठी कांबळे यांना भेटा, असे सांगून लाच देण्यास प्रोत्साहन दिल्याचे निष्पन्न झाले आहे. दोघांनी प्रत्यक्षात लाच स्वीकारली नाही, परंतु लाच मागितल्याचे निष्पन्न झाल्यामुळे गुन्हा दाखल करून अटकेची कारवाई केली. उपाधीक्षक उमेश पाटील, निरीक्षक किशोरकुमार खाडे, कर्मचारी ऋषिकेश बडणीकर, सलीम मकानदार, चंद्रकांत जाधव आदींच्या पथकाने कारवाई केली.
