मिरज प्रतिनिधी | गोपनीय खबऱ्या – मिरज तालुक्यातील एका गावातील आठ वर्षीय शाळकरी मुलीवर ६५ वर्षीय वृद्धाने अत्याचार केल्याचा धक्कादायक प्रकार उघडकीस आला आहे. सुभाष उर्फ भैय्या गोविंद कांबळे असे या नराधमाचे नाव आहे.
ही घटना २६ फेब्रुवारी रोजी घडली. याबाबत पीडितेच्या आजीने शनिवारी (दि.१५) ग्रामीण पोलिस ठाण्यात फिर्याद दिली. पोलिसांनी नराधम सुभाष कांबळे याला अटक केली असून त्याला १९ मार्चपर्यंत पोलीस कोठडी सुनावली आहे.
याबाबत पोलिसांनी दिलेली माहिती अशी की, पीडित अल्पवयीन मुलीला एका ५५ वर्षीय महिलेने दत्तक घेतले आहे. ते मिरज तालुक्यातील एका गावात राहण्यास असून पीडिता तिसरीला शिकण्यास आहे. संशयित नराधम कांबळे हा शेजारीच राहतो. तो मोलमजुरी करत असून २६ फेब्रुवारी रोजी पीडिता अंगणात खेळत होती. संशयित कांबळे याने पीडितेला घरात बोलवून घेतले. तिच्यावर अत्याचार केले. त्यानंतर पीडिता घरी गेली. तिला त्रास जाणवू लागल्याने ती रडू लागली. पीडितेला घरगुती उपचार करण्यात आले. परंतू अधिकचा त्रास होवू लागल्याने रूग्णालयात दाखल करण्यात आले. त्यावेळी हा प्रकार उघडकीस आला. पीडितेच्या कुटुंबियांनी ग्रामीण पोलिस ठाण्यात धाव घेत तक्रार दिली. ग्रामीण पोलिसांनी नराधम कांबळे याला अटक केली. त्याच्याविरोधात बालकाचे लैंगिक अपराधापासून संरक्षण कायद्यानुसार गुन्हा दाखल करण्यात आला आहे. अधिक तपास सहायक निरीक्षक कल्याणी शिंदे करत आहेत.
मुलींची सुरक्षितता ऐरणीवर
काही महिन्यापूर्वी जत तालुक्यातील एका गावात बालिकेवर अत्याचार करून खून करण्यात आल्याची घटना घडली होती. आता मिरज तालुक्यातील एका गावात शाळकरी मुलीवर अत्याचार करण्यात आले. जिल्ह्यात अल्पवयीन मुलींच्या सुरक्षिततेचा प्रश्न पुन्हा ऐरणीवर आला आहे.
