- सांगली प्रतिनिधी | गोपनीय खबऱ्या
एका पोल्ट्री फार्मच्या शेडमध्ये सुरू असलेला तीन पानी जुगार अड्डा उध्वस्त करत पोलिस अधीक्षकांच्या विशेष पथकाने छापा टाकला. याठिकाणी जुगार खेळणाऱ्या नऊ जणांवर कारवाई करून रोकड, मोबाईल, वाहने असा सहा लाखांचा मुद्देमाल जप्त केला. पलूस तालुक्यात जुगार अड्ड्यावर केलेल्या या मोठ्या कारवाईने खळबळ उडाली होती.
दिलीप लक्ष्मण माने (५७, चोपडेवाडी), कुष्णात शिवाजी सूपणेकर (३०, माळवाडी), हणमंत मारुती नलवडे (४८ माळवाडी), भारत शिवाजी पवार (४२ विटा नाका, तासगाव), बालेचाँद यासिन सलामत (६६, चोपडेवाडी), धनाजी हणमंत माने (३२, चोपडेवाडी), नरेंद्र विलास कांबळे (३६, तासगाव), उत्तम मारुती गराडे (५०, भिलवडी) आणि राहुल संभाजी जाधव (२७, निमणी) अशी कारवाई केलेल्या संशयितांची नावे आहेत.
जिल्ह्यातील अवैध धंद्यांवर कारवाईच्या सूचना पालकमंत्र्यांनी दिल्या आहेत. त्यानुसार अधीक्षक संदीप घुगे यांच्या नेतृत्वात खास पथक तयार करण्यात आले आहे. पलूस तालुक्यातील खंडोबाचीवाडी येथे दिलीप लक्ष्मण माने हा पैसे लावून बेकायदेशीर स्वतःच्या फायद्यासाठी साथीदारांसह तीन पानी जुगार अड्डा चालवत आहे, अशी माहिती पथकास मिळाली.
यानंतर तत्काळ सायबर पोलिस ठाण्याच्या अधिकारी आणि कर्मचाऱ्यांना कारवाईचे आदेश दिले. त्यानुसार पथकाने त्याठिकाणी जाऊन पहिले असता पोल्ट्री फार्मच्या शेडमध्ये नऊ जण तीन पानी जुगार खेळत असल्याचे निदर्शनास आले. यानंतर त्याठिकाणी छापा टाकून नऊ जणांना ताब्यात घेण्यात आले. दरम्यान, भिलवडी पोलिसांनी परिसरात बेकायदा व्यवसायांवर नजर ठेवली आहे.
