पीडित दिव्यांग अल्पवयीन मुलगी मुलांसोबत खेळत असताना यादवने तिला घरात बोलावून घेत लैंगिक अत्याचार केला होता. वारंवार या मुलीला तो बोलावत होता.
कोल्हापूर : दिव्यांग मुलीच्या (Disabled Girl) असहाय्यतेचा फायदा घेऊन तिच्यावर वारंवार अत्याचार करणाऱ्या दादू नारायण यादव (वय ७०) याला न्यायालयाने (Kolhapur Court) दोषी ठरवले.जिल्हा व सत्र न्यायाधीश पी. एफ. सय्यद यांनी आरोपीला २० वर्षे सक्तमजुरीची शिक्षा ठोठावली. ऑगस्ट २०१९ मध्ये हा प्रकार उघडकीस आला होता.
पीडित दिव्यांग अल्पवयीन मुलगी मुलांसोबत खेळत असताना यादवने तिला घरात बोलावून घेत लैंगिक अत्याचार केला होता. वारंवार या मुलीला तो बोलावत होता. घडला प्रकार मुलीने आईला व चुलतीला सांगितल्यानंतर त्यांनी आरोपीला याबाबत विचारणा केली होती.
यावर तो मुलीच्या घरच्यांना उद्धट उत्तरे देत होता. मुलीच्या घरच्यांनी याबाबत पेठवडगाव पोलिस ठाण्यात दिलेल्या फिर्यादीवरून आरोपीविरोधात बलात्कारासह पोक्सोंतर्गत गुन्हा दाखल झाला होता. खटला जिल्हा व सत्र न्यायालयात चालविण्यात आला.
सहायक सरकारी वकील प्रतिभा जयकर-जाधव यांनी एकूण १३ साक्षीदार तपासले. फिर्यादी, पीडित मुलीसह इतर साक्षीदारांच्या साक्षी महत्त्वाच्या ठरल्या. सरकारी वकिलांनी केलेला युक्तिवाद ग्राह्य मानून न्यायालयाने आरोपीला २० वर्षे सक्तमजुरी व पाच हजार रुपये दंडाची शिक्षा सुनावली. उपनिरीक्षक शरयू देशमुख यांनी सरकारी पक्षाला सहकार्य केले.
