मिरज प्रतिनिधी | गेल्या 30 वर्षांपासून महापालिकेच्या जागेवर अतिक्रमण करून बांधण्यात आलेली नऊ पक्की घरे सोमवारी पोलिस बंदोबस्तात जमीनदोस्त करण्यात आली. न्यायालयाच्या निर्णयानंतर ही कारवाई करण्यात आली.
सहायक आयुक्त अनिस मुल्ला म्हणाले, मिरज तालुका क्रीडा संकुलाजवळ वाल्मिकी घरकुल योजनेजवळ महापालिकेतर्फे बस चार्जिंग स्टेशन उभारण्यात येणार आहे. या जागेवर गेल्या 30 वर्षांपासून सातवेकर यांनी सुमारे नऊ घरे बांधली होती. त्यापैकी सात पक्की घरे होती. हा वाद न्यायालयात गेला होता. न्यायालयाने महापालिकेच्या बाजूने निकाल दिला. त्यामुळे ही घरे त्वरित पाडावीत, असे आदेश आयुक्तांनी दिले. विशेष पथकाने बंदोबस्तात ही घरे हटवली. महापालिकेची गेल्या काही वर्षांतील मिरजेत पक्क्या घरांवर केलेली ही सर्वात मोठी कारवाई आहे.
