जमिनीची नोंद करण्यासाठी मंडल अधिकार्‍याच्या नावाने दोन हजार रुपयांची लाच मागणार्‍या राजापूर (ता. तासगाव) येथील महिला तलाठ्याविरोधात लाचलुचपत प्रतिबंधक विभागाने तासगाव पोलिस ठाण्यात गुन्हा दाखल केला.
सुजाता अण्णाप्पा जाधव (रा. वारणा प्रेस्टिज अपार्टमेंट, वारणाली, सांगली) असे गुन्हा दाखल झालेल्या महिला तलाठ्याचे नाव आहे.
याबाबत माहिती अशी की, सुजाता जाधव ही राजापूर (ता. तासगाव) येथे तलाठी म्हणून कार्यरत आहे. तक्रारदारांनी तिच्या भावाकडून राजापूर हद्दीतील जमीन खरेदी केली होती. या जमीन खरेदी दस्ताची नोंद सात-बारापत्रकी करण्यासाठी तक्रारदाराकडे पाच हजार रुपये लाचेची मागणी केल्याची तक्रार दि. 11 रोजी लाचलुचपत प्रतिबंधक विभागाकडे प्राप्त झाली होती. लाचलुचपत प्रतिबंधक विभागाच्या पथकाने या तक्रारीची पडताळणी केली. पडताळणीत जाधव हिने मंडल अधिकार्‍याच्या नावे दोन हजार व स्वतःसाठी एक हजार रुपये लाचेची मागणी केल्याचे निष्पन्न झाले. तडजोडीअंती मंडल अधिकार्‍यांसाठी दोन हजार लाचेची मागणी पंचांसक्षम केली होती. त्यानुसार लाचलुचपत प्रतिबंधक विभागाने जाधव हिच्याविरोधात तासगाव पोलिस ठाण्यात गुन्हा दाखल केला. या कारवाईमुळे तासगाव तालुक्यात खळबळ उडाली आहे.
ही कारवाई उपअधीक्षक उमेश पाटील यांच्या नेतृत्वाखाली निरीक्षक विनायक भिलारे, अंमलदार सीमा माने, अजित पाटील, प्रीतम चौगुले यांच्या पथकाने केली. अधिक तपास निरीक्षक विनायक भिलारे करीत आहेत.
