रत्नागिरी – नागपूर राष्ट्रीय महामार्गावर मिरज येथे रस्त्याच्या विरुद्ध दिशेने जात असताना भरधाव टेम्पोवर जाऊन आदळल्याने दुचाकीस्वाराचा जागीच मृत्यू झाला. नंदकुमार तानाजी वायदंडे (वय 50, रा.कोसारी, ता. जत) असे त्यांचे नाव आहे. यामध्ये त्यांची पत्नी गंभीर जखमी झाली आहे.
जत तालुक्यातील कोसारी येथील नंदकुमार वायदंडे हे पत्नीसह कोल्हापूर येथे मुलगी व जावई यांना भेटण्यासाठी निघाले होते. मिरजेत आल्यानंतर राष्ट्रीय महामार्गावर रस्त्याच्या विरुद्ध दिशेने ते कोल्हापूरकडे निघाले होते. यावेळी कोल्हापूरहून मिरजकडे भरधाव वेगाने येणार्या टेम्पोला वायदंडे यांच्या दुचाकीची धडक बसली. यामध्ये नंदकुमार वायदंडे यांचा जागीच मृत्यू झाला, तर त्यांची पत्नी गंभीर जखमी झाली. पत्नीवर रुग्णालयात उपचार करण्यात येत आहेत. याबाबत महात्मा गांधी चौक पोलिस ठाण्यात नोंद आहे.
