विटा प्रतिनिधी | यूट्यूबवर बातमी प्रसारित करण्याच्या वादातून येथे यूट्यूबच्या पत्रकारावर जीवघेणा हल्ल्या करण्यात आला. ही घटना मंगळवारी रात्री पावणेआठच्या सुमारास घडली. प्रसाद प्रकाश पिसाळ (वय 33) आणि सुषमा विजयकुमार जोशी अशी हल्ल्यातील जखमींची नावे आहेत.पिसाळ गंभीर जखमी आहेत.
याप्रकरणी विटा पोलिसांनी विट्यातील राहुल जाधव, सागर भानुदास चोथे आणि विनोद सावंत यांच्यासह लेंगरेतील सुनील पवार या चार जणांवर भारतीय न्याय संहिता कलम 109, 3 (5) आणि शस्त्र अधिनियम 4,25 प्रमाणे गुन्हा दाखल झाला आहे. सर्वजण अंदाजे 25 ते 30 या वयोगटातील आहेत. याबाबत पिसाळ यांनी फिर्याद दिली आहे.
विटा पोलिसांनी सांगितले की, पिसाळ विटा मायणी रस्त्यावरील कार्यालयात असताना मंगळवारी रात्री राहुल, सुनील, सागर व विनोद तेथे आले. राहुलने कोयत्यासारख्या घातक शस्त्राने आणि सुनीलने स्टिलच्या रॉडने पिसाळ यांच्या हातावर डोक्यावर, पाठीवर, पायावर हल्ला केला. त्याचवेळी प्रसाद यांना सोडवण्यास आलेल्या सुषमा यांनाही मारहाण केली. यावेळी आजूबाजूचे लोक गोळा झाल्यामुळे हल्लेखोर पळून गेले. त्यानंतर पिसाळ यांना येथील खासगी रुग्णालयात दाखल केले. विट्याचे उपविभागीय पोलिस अधिकारी विपुल पाटील, पोलिस निरीक्षक धनंजय फडतरे यांनी पोलिस कर्मचार्यांसह संबंधित रुग्णालयाला भेट देऊन जखमीची विचारपूस केली. सहायक पोलिस निरीक्षक जालिंदर पळे तपास करीत आहेत.
- दोघांना अटक; दोघे फरारी
या प्रकरणातील राहुल जाधव आणि सुनील पवार या दोघांना विटा पोलिसांनी तत्काळ अटक केली आहे. सागर चोथे आणि विनोद सावंत फरारी आहेत.
