कोतवाल – तलाठी – मंडळ अधिकारी -नायब तहसीलदार -तहसीलदार -प्रांतधिकारी -उप जिल्हाधिकारी – जिल्हाधिकारी….. अशा महसूल विभागातील प्रत्येक जबाबदार पदावर बसलेल्या व्यक्तींना अलीकडंच्या काळात लाच घेण्याची सवय लागल्याचे दिसून येत आहे. पैसे घेतल्याशिवाय कोणाचेच काम करायचे नाही जणू असा चंगच बांधलाय..!
पन्हाळा प्रतिनिधी | गोपनीय खबऱ्या – बक्षीसपत्राची नोंद घालण्याकरिता कोडोली येथील मंडल अधिकारी अरुण भानुदास माळगे (49, रा. शिराळा नाका, कचरे गल्ली, इस्लामपूर, ता. वाळवा) याला योगेश यशवंत गावडे (29, रा. शिनगारे गल्ली, कोडोली, ता.पन्हाळा) व सुशांत सुभाष चौगुले (30, रा. शहापूर, ता. पन्हाळा) या दोन पंटरमार्फत दोन हजार रुपयांची लाच घेताना लाचलुचपत प्रतिबंधक विभागाने बुधवारी सायंकाळी कोडोली मंडल कार्यालयातच रंगेहाथ पकडले.
याप्रकरणी मंडल अधिकारी माळगेसह पंटर योगेश गावडे व सुशांत चौगुले यांच्या विरुद्ध कोडोली पोलिस ठाण्यात गुन्हा दाखल झाला आहे. याप्रकरणी तिघांनाही पोलिसांनी अटक केली आहे. कोडोली येथील एका शेतकर्याची शेतजमीन नावावर करणेकरिता पन्हाळा महसूल विभागाकडे एक महिन्यापूर्वी ऑनलाईन अर्ज केला होता. हा अर्ज तपासणी व पुढील कार्यवाहीसाठी कोडोली येथील मंडल अधिकारी कार्यालयात आला होता.
मंडल अधिकारी याचा पंटर योगेश गावडे याने तक्रारदारला मंगळवारी (दि 11) कार्यालयात बोलवून घेतले होते. तक्रारदार बराचवेळ कार्यालयात थांबूनही माळगे भेटू न शकल्याने तक्रारदार निघून गेले. पुन्हा पंटर गावडे याने तक्रारदाराच्या दुकानात जाऊन भेटून शेतजमीन सातबारा पत्रकी नोंद करण्यासाठी मंडल अधिकार्यास दोन हजार पाचशे रुपये द्यावे लागतील, असे सांगितले. यावेळी तक्रारदार व मंडल अधिकारी यांच्यामध्ये तडजोड होऊन 2 हजार रुपये देण्याचे ठरले. याची तक्रार संबंधित तक्रारदाराने कोल्हापूर लाचलुचपत प्रतिबंधक विभागाकडे केली होती.
त्यावरून बुधवारी सायंकाळी पाचच्या दरम्यान पथकाने सापळा रचून मंडल अधिकारी कार्यालयातच तक्रारदार पंटरकडे दोन हजार रुपये देताना पथकातील पोलिस निरीक्षक बापू साळुंखे, सुनील घोसाळकर, सचिन पाटील, संदीप पवार, गजानन कुराडे यांनी रंगेहाथ पकडले. याप्रकरणी मंडल अधिकारी अरुण माळगे, पंटर योगेश गावडे व सुशांत चौगुले यांच्या विरुद्ध कोडोली पोलिस ठाण्यात गुन्हा दाखल करण्यात आला आहे. याप्रकरणी मंडल अधिकार्यास तिघांना पोलिसांनी अटक केली आहे.
