मिरजेतील म्हैसाळ रस्त्यावरील उड्डाणपूल आणि मार्केट यार्डातील शेतकरी भवन गांजा विक्रीसाठी आलेल्या खालिद रियाज मोमीन (वय ३३, रा. अमर टॉकीजसमोर, ख्वॉजा झोपडपट्टी, मिरज), हुसेन ऊर्फ ‘गुरुजी’ मैनुद्दीन मुल्ला (वय ४९, रा.अमननगर, मालगाव रस्ता, मिरज), हुसेन बादशहा सय्यद या तिघांना स्थानिक गुन्हे अन्वेषणच्या पथकाने अटक केली. तर मौला हसन टेमकर (रा. बिस्मिल्ला कॉलनी, मिरज), संदीप रास्ते (रा. विसापूर, ता. तासगाव) हे दोघे पसार आहेत. कारवाईत तीन किलो गांजासह ७४ हजार रुपयांचा मुद्देमाल जप्त केला, अशी माहिती निरीक्षक सतीश शिंदे यांनी दिली.
गांजासह अमली पदार्थांची तस्करी करणाऱ्यांवर कारवाईचे आदेश अधीक्षक संदीप घुगे यांनी दिले आहे. त्यानुसार निरीक्षक शिंदे यांच्या नेतृत्वाखाली खास पथके तयार करण्यात आली आहे. पथकातील कर्मचारी अनंत कुडाळकर यांना खालिद मोमीन हा म्हैसाळ रस्ता उड्डाणपुलाजवळ गांजा विक्रीसाठी येणार असल्याची माहिती मिळाली. त्यानुसार पथकाने तेथे जाऊन सापळा रचला.
थोड्याच वेळात खालीद तेथे आला. त्याला ताब्यात घेऊन झडती घेतली. त्याच्याकडे हिरवट-काळपट रंगाचा फुलबोंडे असलेला २ किलो ९४ ग्रॅम वजनाचा गांजा आढळला. त्याने मौला टेमकर व हुसेन मुल्ला या दोघांनी विक्रीसाठी दिल्याची कबुली दिली.
दरम्यान, गुन्हे अन्वेषणकडील कर्मचारी सोमनाथ पतंगे यांना हुसेन सय्यद हा मिरज मार्केट यार्डातील शेतकरी भवनजवळ गांजा विक्रीसाठी येणार असल्याची माहिती मिलाली. त्यानुसार पथकाने सापळा रचला.
हुसेन सय्यद आल्यानंतर त्याला ताब्यात घेतले. झडती घेतल्यानंतर त्याच्याकडे ८६४ ग्रॅम गांजा मिळाला. गांजा कोठून आणला याची चौकशी केल्यानंतर त्याने संदीप रास्ते याच्याकडून गांजा आणल्याची कबली दिली. पोलिस अधिक तपास करत आहेत.
