मिरज प्रतिनिधी | येथील शहर पोलिस ठाण्यासमोर तरुणाने पेट्रोल ओतून पेटवून घेण्याचा प्रयत्न आज केला. चोरीच्या गुन्ह्याचा तपास योग्यरितीने केला जात नाही असे तरुणाचा आरोप होता. नासिर शरीकमसलत (वय ३२, रा. मुजावर गल्ली, मिरज) असे तरुणाचे नाव असून, पोलिस कर्मचारी व नागरिकांनी त्याला रोखल्याने पुढील अनर्थ टळला. शरीकमसलत हा सायंकाळी शहर पोलिस ठाण्यासमोर आला. त्याने सोबत आणलेल्या बाटलीतील पेट्रोल अंगावर ओतून पेटवून घेण्याचा प्रयत्न केला. पोलिस कर्मचारी फारुख नालबंद, मारुफ चमनशेख यासह इतरांनी त्याच्या हातातील पेट्रोलची बाटली काढून घेऊन त्यास रोखले.
काही दिवसांपूर्वी शरीकमसलत याच्या मालकीच्या सात शेळ्या चोरीस गेल्या आहेत. चोरीचा प्रकार घडल्यानंतर त्याने पोलिस ठाण्यात फिर्याद दाखल केली होती. शेळ्या चोरणाऱ्या संशयितास त्याने पकडून पोलिसांच्या ताब्यात दिले तरीही पोलिसांनी त्यास सोडून दिल्याची नासिर शरीकमसलत याची तक्रार होती. याबाबत पाठपुरावा करूनही दाद दिली जात नसल्याचा त्याचा आरोप होता. नासिर याच्या तक्रारीचा योग्य तपास करून चोरट्यावर कारवाई करू, असे त्याला सांगण्यात आले.
