- सख्ख्या भावांना केले पोलिस दलातून सेवामुक्त
जात पडताळणी प्रमाणपत्र सादर न केल्यामुळे विभागीय चौकशी अहवालानंतर दोघा सख्ख्या भावांना पोलिस दलातील सेवेतून मुक्त केले.
पोलिस उपनिरीक्षक महेश रमेश शिंदे आणि पोलिस नाईक विष्णू रमेश शिंदे अशी त्यांची नावे आहेत. याचे आदेश पोलिस अधीक्षक महेंद्र पंडित यांनी काढले.
पोलिसांनी सांगितले, की उपनिरीक्षक महेश शिंदे हे सप्टेंबर १९९१ ला, तर विष्णू शिंदे हे ऑगस्ट २००४ ला भटक्या जमाती ‘ब’ वर्गातून भरती झाले होते. भरती वेळी त्यांनी जात प्रमाणपत्र सादर केले होते. त्याआधारे त्यांना आरक्षणातून नोकरी मिळाली होती. मात्र, त्यानंतर उच्च न्यायालयाने सेवेतील सर्वांची जात पडताळणी करण्याचे आदेश दिले होते. त्यानंतर वारंवार माहिती देऊनही दोघांनीही जात पडताळणी प्रमाणपत्र सादर केले नाही.
त्यानंतरही त्यांची सेवा सुरूच होती. विष्णू सध्या पोलिस मुख्यालयात तर महेश राधानगरी पोलिस ठाण्यात कार्यरत होते. त्यांच्या जात पडताळणी प्रमाणपत्राबाबत उच्च न्यायालयात दावा दाखल आहे.
दरम्यान, पोलिस अधीक्षकांकडून दोघांच्या जात पडताळणी प्रमाणपत्राबाबत विभागीय चौकशी नेमली. कोल्हापूर आणि गडहिंग्लज येथील अपर पोलिस अधीक्षकांनी याची चौकशी पूर्ण केली. त्यांनी दिलेल्या अहवालानंतर दोघांनाही सेवेतून मुक्त केले. त्यांनी वेळेत जात पडताळणी प्रमाणपत्र सादर न केल्यामुळे ही कारवाई केल्याची माहिती अधीक्षक महेंद्र पंडित यांनी दिली.
