कोल्हापूर – गोपनीय खबऱ्या | राज्यात विधानसभा निवडणुकांचे वारे वाहू लागले आहेत. विधानसभेच्या मोर्चेबांधणीसाठी सर्व पक्ष तयारीला लागले असतानाच राष्ट्रवादी काँग्रेस अजित पवार पक्षाला कोल्हापूरमध्ये मोठा धक्का बसला आहे.
राष्ट्रवादी काँग्रेस अजित पवार गटाचे प्रदेश उपाध्यक्ष आणि जिल्हा बँकेचे संचालक आनंदराव यशवंतराव तथा ए. वाय. पाटील यांनी पक्षाला रामराम ठोकला आहे.
- कोल्हापूरमध्ये अजित पवार गटाला धक्का
याबाबत सविस्तर माहिती अशी की, एकीकडे विधानसभेच्या तयारीसाठी राष्ट्रवादी काँग्रेस पक्ष अजित पवार गटाने कंबर कसली आहे. स्वतः अजित पवार निवडणुकासाठी मोर्चेबांधणी करत असून जनसन्मान यात्रेच्या माध्यमातून महाराष्ट्र पिंजून काढत आहेत. अशातच कोल्हापूरमध्ये राष्ट्रवादी काँग्रेस पक्षाला मोठे खिंडार पडले आहे.
- ए. वाय पाटील यांचा तडकाफडकी राजीनामा
राष्ट्रवादी काँग्रेसच्या अजित पवार गटाचे प्रदेश उपाध्यक्ष आणि केडीसीसी बँकेचे संचालक ए. वाय. पाटील यांनी आपल्या पदाचा तडकाफडकी राजीनामा दिला आहे. राष्ट्रवादीचे प्रदेश उपाध्यक्ष सुनील तटकरे यांच्याकडे त्यांनी राष्ट्रवादीच्या प्राथमिक सदस्यत्वासह सर्व पदांचा राजीनामा पाठवला आहे.
- मविआमधून विधानसभा लढवणार..?
ए. वाय पाटील यांनी पाठवलेल्या राजीनाम्यात वैयक्तिक अडचणींचे कारण दिले असले तरी ते महाविकास आघाडीच्या वाटेवर असल्याच्या चर्चा राजकीय वर्तुळात सुरू आहेत. ए वाय पाटील हे राधानगरी विधानसभा मतदारसंघातून महाविकास आघाडी कडून रिंगणात उतरण्याची शक्यता आहे. त्यामुळे विधानसभेआधी ते मविआमध्ये जाऊ शकतात. दरम्यान, अजित पवार गटाला विधानसभेआधी हा सर्वात मोठा धक्का मानला जात आहे.
