पालकमंत्री सुरेशभाऊ खाडे यांच्या प्रयत्नातून देवस्थान समितीला २० वर्षांनी मिळाले यश
मिरज खबऱ्या प्रतिनिधी – पुण्यश्लोक अहिल्यादेवी होळकर ग्रामीण यात्रास्थळ योजना ‘ब’ वर्ग अंतर्गत ग्रामीण तीर्थस्थळांना ‘ब’ वर्ग दर्जा देण्यासंदर्भात २९ डिसेंबर २०२३ रोजीच्या बैठकीत प्रस्ताव मांडण्यात आला. त्यानुसार आटपाडीतील खरसुंडीच्या श्री सिद्धनाथ देवस्थानाला ‘ब’ वर्ग दर्जा प्रदान करण्यात आल्याचा शासन निर्णय झाला आहे.
जिल्ह्यातील खरसुंडी येथील तीर्थक्षेत्र श्री सिद्धनाथ देवस्थानला ५ कोटी रुपयांचा निधी प्रस्तावित केला आहे. गेली २० वर्षांपासून प्रतीक्षा करीत असलेल्या श्री सिद्धनाथ देवस्थान समितीला अखेर यश मिळाले. राज्याचे कामगार मंत्री तथा जिल्ह्याचे पालकमंत्री ना. सुरेशभाऊ खाडे यांच्या विशेष प्रयत्नातून ५ कोटी रुपयांचा निधी प्रस्तावित असल्याने खरसुंडी येथील नागरिक व श्री सिद्धनाथाचे भाविक वर्ग यांनी समाधान व्यक्त केले आहे.
श्री सिद्धनाथ देवस्थान मंदिराचा परिसर सुशोभीत करणे, भक्त निवास बांधणे, सभा मंडप, मंदिराकडे येणाऱ्या रस्त्यांची सुधारणा करणे, मल्टीपर्पज हॉल बांधणे व शॉपिंग कॉम्प्लेक्स बांधणे आदी सेवा सुविधा निर्माण करण्यासाठी ५ कोटी रुपयांचा फंड मंजूर झाल्यानंतर विकास कामासाठी वापरण्यात येणार असल्याचे यावेळी मंत्री सुरेशभाऊ खाडे यांनी पत्रकार बैठकीत सांगितले.
