मुंबई : भाजपाचे नेते आणि केंद्रीय गृहमंत्री अमित शाह हे काल रविवारी (ता. ०७ जानेवारी) मुंबईत आल्याची माहिती समोर आली आहे. अमित शाह हे काल रात्री मुंबईत दाखल झाले आणि त्यानंतर त्यांनी थेट एचएन रिलायन्स रुग्णालय गाठले.
या रुग्णालयात अमित शाहांची बहिण उपचार घेत असल्याची माहिती असून त्यांची विचारपूस करण्यासाठीच ते मुंबईत आल्याचे सांगण्यात येत आहे. त्यांचा हा खासगी दौरा होता. ज्यामुळे त्यांनी कोणाचीही भेट घेतली नाही, तर केवळ मुख्यमंत्री एकनाथ शिंदे हे रुग्णालयात दाखल झाले होते. अमित शाह हे रुग्णालयात आल्याने त्या ठिकाणी पोलिसांचा मोठा बंदोबस्त तैनात करण्यात आलेला होता.
गोपनीय खबऱ्याला मिळालेल्या माहितीनुसार, केंद्रीय मंत्री अमित शाह हे काल रात्री साडे नऊ वाजताच्या सुमारास अचानक मुंबईत दाखल झाले. त्यानंतर त्यांनी थेट मुंबईतील प्रतिष्ठित असे एचएन रिलायन्स रुग्णालय गाठले. ज्या ठिकाणी शाहांची बहिण उपचार घेत आहे. यावेळी ते बराच वेळ या रुग्णालयात होते. त्यांनी बहिणीची विचारपूस केली, त्यानंतर त्यांनी डॉक्टरांशी देखील त्यांच्या बहिणीवर सुरू असलेल्या उपचाराची चर्चा केल्याची माहिती आहे. अमित शाह यांच्यासोबत त्यांचे नातेवाईक सुद्धा उपस्थित होते. तर साधारणतः पावणे दोन तास यावेळी रुग्णालयात उपस्थित असल्याचे सांगण्यात येत आहे.
अमित शाह यांचा हा पूर्णतः खासगी दौरा होता. ज्यामुळे त्यांनी कोणत्याही नेत्याची भेट घेतली नाही. याशिवाय त्यांनी कोणतीही बैठक घेतली नाही. केवळ बहिणीच्या तब्येतीची विचारपूस करून ते पुन्हा दिल्लीला रवाना झाले. मात्र, यावेळी मुख्यमंत्री एकनाथ शिंदे हे रुग्णालयात पोहोचल्याची माहिती समोर आली. अमित शाह मुंबईत आल्याची माहिती मिळताच मुख्यमंत्री एकनाथ शिंदे हे रिलायन्स रुग्णालयात दाखल झाले होते. मुख्यमंत्री शिंदेही 15 ते 20 मिनिटे रुग्णालयात होते. त्यांनीही शाह यांच्या बहिणीची भेट घेऊन विचारपूस केली. शिंदे यांनी डॉक्टरांशीही चर्चा करून उपचाराची माहिती घेतली. याचवेळी उद्योगपती मुकेश अंबानी सुद्धा रुग्णालयात उपस्थित होते, अशी माहिती सूत्रांकडून देण्यात आली आहे. अमित शाह मुंबईत आल्याचं कळताच रुग्णालयाभोवती पोलिसांचा बंदोबस्त वाढवण्यात आला होता. तर, वरिष्ठ अधिकाऱ्यांनीही रुग्णालयात धाव घेतली होती. अमित शाह हे त्यांच्या खासगी कामासाठी मुंबईत आल्याने रुग्णालयाबाहेर गर्दी होऊ नये, किंवा अन्य कोणताही अडथळा निर्माण होऊ नये, यासाठी खबरदारी घेण्यात आली होती.
