- सासू,दिर जावेसह चौघेजण ताब्यात
कडेगांव: तालुक्यातील नेवरी येथे महिलेचे डोके दगडाने ठेचून ,गळ्यावर, डोक्यात धारदार शस्त्राने वार करून खून करण्यात आला आहे.महिलेचा पती व चुलत दिरावरही वार केल्याने तेही गंभीर जखमी झाले. प्रियांका अजय महाडीक (वय २५) असे खून झालेल्या महिलेचे नाव आहे. अजय आप्पासाहेब महाडीक (३०) व नवनाथ बाबूराव महाडीक (४५) अशी जखमींची नावे आहेत. ही घटना शनिवारी सायंकाळी घडली. अजय यास विटा येथील खासगी रुग्णालयात दाखल करण्यात आले आहे. याबाबत कडेगाव पोलिसात नोंद झाली आहे.याप्रकरणी महिलेची सासू तारामती आप्पासाहेब महाडीक, दीर शरद आप्पासाहेब महाडीक, जाऊ उज्ज्वला शरद महाडीक, पुतण्या अभिषेक शरद महाडीक या संशयितांना पोलिसांनी ताब्यात घेतले आहे.
नेवरी येथे शेडवस्तीनजीक महाडीक कुटुंब राहते. शरद व अजय हे सख्खे भाऊ आहेत. शरदचा मुंबई येथे रिक्षाचा व्यवसाय आहे. तो पंधरा दिवसांपूर्वी नेवरी येथे आला आहे शनिवारी सायंकाळी दोन्ही कुटुंबात भांडण सुरू झाले. रागाच्या भरात दीर शरद आणि पुतण्या अभिषेक याने धारदार शस्त्राने प्रियांकाच्या डोक्यावर व गळ्यावर तसेच तिचा पती अजयच्याही डोक्यावर वार केले त्यामुळे प्रियांकाचा जागीच मृत्यू झाला, तर भांडण सोडविण्यासाठी गेलेल्या मयत महिलेचा चुलत दीर नवनाथ महाडीक जखमी झाला. त्यास स्थानिक रुग्णालयात उपचारासाठी दाखल करण्यात आले.
