मिरज : चार महिन्यांची हजेरी लावून मानधन काढून दिल्याच्या मोबदल्यात १२ हजारांच्या लाचेची मागणी करत त्यातील आठ हजार रुपये स्विकारताना महापालिकेच्या प्रभारी मुकादमास लाचलुचपत प्रतिबंधक विभागाने रंगेहाथ पकडले.
किशोर जगन्नाथ जबडे (वय ४८, रा. मदिना मश्जिदजवळ, सुभाषनगर) असे संशयिताचे नाव आहे. मिरज शहर पोलिस ठाण्याजवळ असलेल्या चहा टपरीजवळ ही कारवाई करण्यात आली.
तक्रारदार हा मानधनावर महापालिकेकडे सेवेत आहे तर संशयित किशोर जबडे हा आरोग्य विभागात प्रभाग २० साठी प्रभारी मुकादम म्हणून कार्यरत आहे. तक्रारदाराची चार महिन्यांची हजेरी लावून मानधन काढून देण्याच्या मोबदल्यात प्रत्येक महिन्याचे तीन हजार असे १२ हजारांची मागणी तक्रारदाराकडे केली होती. तडजोडीअंती आठ हजारांची लाचेची मागणी केल्याचे ‘लाचलुचपत’च्या तपासात निष्पन्न झाले होते.
त्यानुसार मिरज शहर पोलिस ठाण्याच्या बाजूस असलेल्या एका चहा टपरीजवळ सापळा लावला असता, तक्रारदाराकडून आठ हजारांची लाच स्विकारताना जबडे याला रंगेहाथ पकडण्यात आले. जबडे याच्यावर मिरज शहर पोलिस ठाण्यात भ्रष्टाचार प्रतिबंध अधिनियमाखाली गुन्हा दाखल करण्याची प्रक्रिया रात्री उशिरापर्यंत सुरू होती. लाचलुचपतचे उपअधीक्षक संदीप पाटील यांच्या मार्गदर्शनाखाली निरीक्षक विनायक भिलारे, दत्तात्रय पुजारी, प्रीतम चौगुले, रामहरी वाघमोडे, अजित पाटील, सुदर्शन पाटील आदींच्या पथकाने ही कारवाई केली.
