प्रशासनाच्या चालढकल योजनेमुळे लोकप्रतीनिधी आक्रमक
तासगांव:- तासगांव तालुक्यातील तुरची ग्रामपंचायत हद्दीमध्ये सिटी सर्व्हे मिळकतीत ग्रामपंचायतीचा मालकीच्या जागेत अतिक्रमण करण्यात आले असून ते अतिक्रमण शासकीय नियमाप्रमाणे प्रशासनाने काढून टाकावे अन्यथा मुख्य कार्यकारी अधिकारी यांना भेटून आंदोलनातमक पवित्रा घेऊ असे निवेदन उपसरपंच भाऊसो खरात यांचेसह आठ ग्रामपंचायत सदस्यांनी ग्रामसेवकांना दिले आहे. प्रशासनास वारंवार तोंडी सांगून ही जबाबदारी ढकलून अतिक्रमण काढण्यास प्रशासन चालढकल करीत असल्याने येथील लोकप्रतिनिधी आता आक्रमक झाले आहेत.
तुरची ग्रामपंचायत हद्दीमध्ये शासकीय जागेत अतिक्रमण करण्यात आले आहे. याबाबत सदस्यांनी मासिक मीटिंग मध्ये वारंवार आवाज उठवला तरी ग्रामसेवक जबाबदारी ढकलत आहेत असा आरोप सदस्यांनी करीत अतिक्रमविरोधी जबाबदारी निश्चित करणारे शासकीय परिपत्रक जोडत उपसरपंच भाऊसो खरात, सदस्य अंकुश पाटील ,सचिन चव्हाण, रोहिणी खबाले, सखुबाई पाटील, लता मोरे, सतीश पाटील ,परशुराम सातपुते यांनी अतिक्रमण काढण्यासाठी लेखी निवेदन ग्रामसेवक यांना दिले आहे. यावेळी खबऱ्या शी बोलताना सर्व सही करणाऱ्या लोकप्रतिनिधींनी सांगितलं की, येत्या आठ दिवसांत प्रशासनानं काही कार्यवाही केली नाही तर नंतर जिल्हा परिषद मुख्य कार्यकारी अधिकारी यांना भेटून आंदोलनात्मक पवित्रा घेऊ.
