LIVE 🛑

 तासगाव येथील केळी विक्रेत्यांचा जागेवरून वाद उफाळून आला आहे. याच वादातून आज रविवारी सकाळी बागणे चौकात रुपेश पेटकर याच्यावर धारदार शस्त्राने हल्ला करण्यात आला. या हल्ल्यात पेटकर गंभीर जखमी झाला आहे. त्याच्यावर सांगली येथील खासगी रुग्णालयात उपचार सुरू आहेत.

नगरपालिकेने बसस्थानक चौकात छत्रपती शिवाजी महाराज व्यापारी संकुल उभारले आहे. याठिकाणी भाजी व फळ विक्रेत्यांसाठी स्टॉल उभारण्यात आले आहेत. मात्र एकही भाजी व फळ विक्रेते या बाजार कट्ट्यावर आपल्या मालाची विक्री करत नाहीत. ही सगळी मंडळी बागणे चौकासह आत जाणाऱ्या रस्त्यावर बसतात.

बागणे चौकाच्या समोरील बाजूसच केळी विक्रेत्यांनी ठाण मांडले आहे. पालिकेने अनेकवेळा या केळी विक्रेत्यांना हटवण्याचा प्रयत्न केला. मात्र प्रत्येकाला कोणाचा ना कोणाचा राजकीय वरदहस्त असल्याने प्रशासनाला कोणीही हिंगलले नाही. त्यामुळे सर्व केळी विक्रेते बागणे चौकातच बसतात. गेल्या अनेक दिवसांपासून याठिकाणी जागेच्या कारणावरून केळी विक्रेत्यांमध्ये वाद सुरू आहे. आज रविवारी सकाळी हा वाद विकोपाला गेला.

याठिकाणी जखमी रुपेश पेटकर याच्यासह अन्य लोक केळी विक्री करतात. आज रविवारी सकाळी जागेच्या कारणावरूनच वाद झाला. याच वादातून पेटकर याच्यावर धारदार शस्त्राने हल्ला झाला. तो गंभीर जखमी झाला आहे. त्याला उपचारासाठी सांगली येथील खासगी दवाखान्यात दाखल करण्यात आले आहे.

हल्ला झाल्याचे समजताच पोलिसांनी तातडीने घटनास्थळी धाव घेऊन पंचनामा केला. सकाळी – सकाळी घडलेल्या या घटनेमुळे शहर हादरले आहे.

नगरपालिकेने आता तरी ठोस पाऊले उचलावीत

तासगाव नगरपालिकेने छत्रपती शिवाजी महाराज व्यापारी संकुल मध्ये भाजी व केळी विक्रेत्यांसाठी स्टॉल उभारले आहेत. मात्र या स्टॉलकडे कोणीही विक्रेता यायला तयार नाही. पालिकेने अनेक वेळा विक्रेत्यांना या स्टॉलवरच आपल्या मालाची विक्री करण्याची सूचना केली आहे. मात्र पालिका प्रशासनाचे कोणीही ऐकत नसल्याचे चिन्ह आहे. प्रत्येकजण कोणाचा ना कोणाचा राजकीय वापर करून बागणे चौकात ठाण मांडून बसला आहे. येथील केळी विक्रेत्यांचा वादाचा टोकाला गेला आहे. याच वादातून आज हल्ला झाला. त्यामुळे पालिकेने आता तरी गांभीर्याने विचार करून केळी विक्रेत्यांसह सर्वच भाजीपाला विक्रेत्यांना स्टॉलवर पाठवावे, अशी मागणी जोर धरू लागली आहे..