🅾️High alert in Delhi : दहशतवादी हल्ल्याचा इशारा मिळाल्यानंतर सुरक्षा यंत्रणा अधिक सतर्क

उत्तर प्रदेश पोलिसांना संभाव्य दहशतवादी हल्ल्यांची माहिती मिळाल्यानंतर राष्ट्रीय राजधानी दिल्लीत हाय अलर्ट जारी करण्यात आला असल्याची माहिती समोर आली आहे. तेहरिक-ए-तालिबान या दहशतवादी संघटनेचा एक निनावी ईमेल काही जणांना आला होता, ज्याची माहिती उत्तर प्रदेश पोलिसांना देण्यात आली होती. त्यानंतर सुरक्षा यंत्रणा अधिक सतर्क झाल्या आहेत.

उत्तर प्रदेश पोलिसांनी या ई मेल संदर्भात दिल्ली पोलिसांनी तत्काळ माहिती दिली आणि त्यानंतर दिल्लीत हाय अलर्ट जारी करण्यात आला. विशेष म्हणजे या अगोदर होळीच्या दिवशी देखील दहशतवादी हल्ल्याची माहिती पोलिसांनी मिळाली होती. त्यामुळे अधिक खबरदारी घेतली जात आहे.
पोलिस सूत्रांनी दिलेल्या माहितीनुसार, काही वृत्तवाहिन्यांना धमकीचे मेल आले आहेत. यामध्ये दिल्लीत स्फोट घडवण्याची धमकी देण्यात आलेली आहे. तेव्हापासून सुरक्षा यंत्रणा सतर्क आहेत.