इस्लामपूर ( प्रतिनिधी ) : सांगली मार्गावर प्रकाश हॉस्पिटल जवळ अचानक वळालेल्या कंटेनरला पाठीमागून आयशर ट्रकने दिलेल्या धडकेत चालकाचा जागीच मृत्यू झाला.लिंगाप्पा बिरू माने ( वय ४० रा. जुना बुधगाव रोड, लक्ष्मीनगर सांगली ) असे मृत आयशर ट्रक चालकाचे नाव आहे. सोमवारी रात्री उशिरा अपघात घडला. याप्रकरणी अज्ञात कंटेनर चालकाच्या विरोधात इस्लामपूर पोलीस ठाण्यात गुन्हा दाखल करण्यात आला आहे .
याबाबतची फिर्याद मृत चालकाचा भाऊ बाळू बिरू माने यांनी इस्लामपूर पोलीस ठाण्यात दिली आहे. पोलिसांनी दिलेली माहिती अशी, आयशर ट्रक ( क्र.एमएच १० – डीटी – ८४४८ )हा सांगली कडून इस्लामपूर कडे येत होता. इस्लामपूर रस्त्यावर प्रकाश हॉस्पिटल च्या परिसरात अचानक एका अज्ञात चालकाने त्याचा कंटेनर ( क्र.एनएल ०१ – एडी – १८८९ ) हा रस्त्याच्या कडेला वळवला.त्यावेळी पाठीमागून येणारा लिंगाप्पा माने यांचा आयशर ट्रक त्या कंटेनरला जोराचा धडकला. यात लिंगाप्पा माने याचा जागीच मृत्यू झाला. या घटनेची नोंद इस्लामपूर पोलीस ठाण्यात करण्यात आले आहे.
