कोल्हापूर : गेल्या अनेक वर्षांपासूनचे आपले मित्र असलेले आ. सतेज पाटील यांना आपण आमच्यासोबत म्हणजे राष्ट्रवादी अजित पवार गटासोबत येण्याबाबत खासगीत सल्ला देणार आहे, असे वैद्यकीय शिक्षण मंत्री हसन मुश्रीफ यांनी शुक्रवारी पत्रकारांशी बोलताना सांगितले.
जिल्ह्याचे पालकमंत्रिपद मिळाल्यास आपण चांगले काम करू तसेच जिल्ह्यातील प्रलंबित प्रश्न मार्गी लावण्याचाही प्रयत्न करू, असेही ते म्हणाले.
राज्य मंत्रिमंडळाचे शुक्रवारी दुपारी खातेवाटप जाहीर झाले. मुश्रीफ यांना वैद्यकीय शिक्षण खाते मिळाले. त्यानंतर बोलताना मुश्रीफ म्हणाले, गेल्या पंधरा वर्षांपासून आपली व आ. सतेज पाटील यांची मैत्री आहे. जिल्ह्याच्या राजकारणात आम्ही अनेक निवडणुका एकत्र लढविल्या आहेत. आगामी विधानसभा, लोकसभेसह सर्व स्थानिक स्वराज्य संस्थांच्या निवडणुकांमध्ये पाटील सोबत आले, तर मित्र राहू. राष्ट्रवादी काँग्रेस आणि काँग्रेसची विचारधारा एकच आहे. त्यामुळे आपण त्यांना खासगीत आमच्यासोबत येण्याची खुली ऑफर दिल्याचे मुश्रीफ यांनी सांगितले.
राज्यातील शासकीय वैद्यकीय महाविद्यालयांच्या अडचणी समजून घेऊन त्या मुख्यमंत्री व उपमुख्यमंत्री यांच्या माध्यमातून सोडविण्याचा प्रयत्न करणार आहे. विशेष सहाय्य आपल्या आवडीचे खाते आहे. बॅरिस्टर ए. आर. अंतुले मुख्यमंत्री असताना त्यांनी संजय गांधी निराधार योजना सुरू केली होती. आपण विशेष सहाय्य मंत्रिपदाच्या कार्यकाळामध्ये त्यातील अनेक त्रुटी दूर करून या योजनेचा विस्तार केला. त्याचा लाभ अनेक निराधार, दिव्यांगांना होत आहे, असेही मंत्री मुश्रीफ यांनी सांगितले.
