भ्रष्टाचाऱ्यांचे धाबे दणाणले
कडेगाव:- कडेगाव तालुक्यात बेकायदेशीरपणे दुबार नोंदी धरून भ्रष्टाचार करणाऱ्या काही भ्रष्ट तलाठयांच्या विरोधात आज एलगार पुकारला जाणार आहे. पाणी संघर्ष चळवळीचे नेते, राष्ट्रवादी काँग्रेसचे पलूस कडेगाव विधानसभा क्षेत्र प्रमुख तथा आंदोलन फेम डी एस देशमुख आज कडेगावचे प्रांताधिकारी डॉ विजयकुमार देशमुख यांची भेट घेऊन निवेदन देणार आहेत. निवेदनाद्वारे भ्रष्ट तलाठयांच्यावर कठोर कारवाईची मागणी देशमुख करणार आहेत. त्यामुळे भ्रष्ट कारभार करणाऱ्या तलाठयांचे धाबे दणाणले आहेत.
तालुक्यात इमानदारीने आणि प्रामाणिकपणे काम करणारे अनेक तलाठी आहेत. परंतु काही थोड्या भ्रष्ट लोकांमुळे सर्वसामान्य जनतेचा तलाठयांकडे बघण्याचा दृष्टिकोन बदलत चालला आहे. आजही अनेक तलाठी आपलं कर्तव्य अगदी निष्ठेने पार पाडत असल्याचे पहावयास मिळते. मात्र इमानदारीने काम करणाऱ्या लोकांच्या तोंडावर भ्रष्ट काम करणारे लोकं ज्या टेम्ब्याने फिरतात त्यामुळं आपणही प्रामाणिक पणा सोडावा, अशी भावना चांगल्या लोकांच्या मनात आल्या वाचून राहत नाही. आणि नेमकं हेच थांबवायचं असेल तर भ्रष्ट लोकांना शिक्षा झाली पाहिजे, ह्या उद्देशाने देशमुख आज प्रांताधिकारी डॉ विजयकुमार देशमुख यांना भेटून निवेदन देणार आहेत.
डॉ देशमुख हे संबंधित निवेदनाच्या अनुषंगाने सखोल चौकशी करून दोषींवर कठोर कारवाई करतील, अशी अपेक्षा सर्वसामान्य जनता व प्रामाणिक पणे काम करणाऱ्या सर्वच कर्मचाऱ्यांना लागून राहिली आहे.
