मिरज प्रतिनिधी / मिरजेतील एसटी स्टँड परिसरात महात्मा गांधी पोलिसांनी रिक्षातून गांजा विक्री करणाऱ्या एका इसमाच्या मुसक्या आवळत कारवाई केली आहे.
मिरजेतील काही भागात खुलेआम गांजा विक्री सुरू असल्याची उलटसुलट चर्चा नागरिकांत सुरू असल्याने कारवाईच्या अनुषंगाने पोलिसांनी कठोर पावले उचलत, आज महात्मा गांधी पोलीस ठाण्याचे एक पथक पेट्रोलिंगसाठी फिरत होते.
गांजा विक्री व तस्करी प्रकरणी वैभव राजू कणशेट्टी रा. मंगळवार पेठ मिरज असे अटक करण्यात आलेल्या आरोपीचे नाव आहे. त्याच्या ताब्यातील रिक्षा क्रमांक एम एच १० के ३०२४ यामधून तो गांजा विक्री करण्यासाठी येणार असल्याची माहिती गोपनीय खबऱ्यामार्फत पोलिसांना मिळाली. त्या अनुषंगाने सापळा लावत आरोपीला ताब्यात घेतले.
कणशेट्टी याच्याकडून ६ किलो ८०० ग्राम गांजा व एक रिक्षा असा एकूण ३ लाख २० हजार १० रुपयांचा मुद्देमाल जप्त करण्यात आला आहे.
याअगोदर रियाज हुक्केरी याच्याही मुसक्या आवळल्या होत्या. मोहन झळके याला याअगोदर गांजा तस्करी प्रकरणी १ वर्षासाठी हद्दपार केले होते.
