कडेगाव:-अवैध वाळू वाहतूक प्रकरणी वांगी मंडळ अधिकाऱ्यांच्या पथकाने कारवाई करून तहसील कार्यालयात आणून लावलेला ट्रॅक्टर पळवून नेल्याची धक्कादायक घटना समोर आल्यानंतर तहसील प्रशासनाचे वतीने वाहन मालकावर कडेगाव पोलीस ठाण्यात गुन्हा दाखल करण्यात आला आहे.
वांगी मंडळ अधिकारी यांचे पथकाने शुक्रवारी रात्री ११:३० च्या दरम्यान वडिये रायबाग येथे विना नंबर चा निळ्या रंगाचा सोनालिका ट्रॅक्टर व निळ्या रंगाची ट्रॉली त्यात सुमारे एक ब्रास वाळू अवैध रितीने वाहतूक करीत असताना पकडून तहसील कार्यालयात आणून लावला होता. ट्रॅक्टर कार्यालयात आणून लावल्या नंतर पथक पुन्हा गस्तीसाठी गेले होते. गस्त घालून आल्यानंतर सुमारे साडेचार च्या दरम्यान पथक तहसील कार्यालयात आले असता वरील ट्रॅक्टर तहसील कार्यालयाच्या आवारात लावले ठिकाणी गौनखनिज पलटी करून पळवून नेल्याचे पथकाचे लक्षात आले. सदर वाहन पळवून नेत असताना आडवे लावलेल्या शासकीय वाहनास इजा पोहचवल्याचे ही पथकाचे लक्षात आले.
त्यानंतर शनिवारी सकाळी पथक प्रमुख तथा मंडळ अधिकारी प्रकाश सूर्यवंशी यांनी सदर घटनेची फिर्याद कडेगाव पोलीस ठाण्यात नोंदवली व वाहन मालक आकाश तानाजी शेळके यावर गुन्हा दाखल करण्यात आला आहे.
अवैध गौण खनिज वाहतूकीवर कडक कारवाई
अवैध गौण खनिज उत्खनन व वाहतुकीवर कठोर कारवाई करणार असल्याचं तहसीलदार अजित शेलार यांनी सांगितले आहे. तसेच शुक्रवारी रात्री पथकाने पकडलेला ट्रॅक्टर वीना नंबर असल्याने याबाबत उपप्रादेशिक परिवहन अधिकाऱ्यांना लेखी कळवून त्यांच्या मार्फत ही कठोर कारवाई साठी लेखी पत्रव्यवहार करणार असल्याचे सांगितले.
