मिरज प्रतिनिधी/ मिरज येथील पूर्व म्हाडा कॉलनी, देवताळे मळा या ठिकाणी पुर्वी झालेल्या वादातून एका महिलेवर दबा धरून बसलेल्या दोघांनी कुऱ्हाडीने घाव घालून जीवे मारण्याचा प्रयत्न केला. राधिका कांबळे (वय २५) असे जखमी महिलेचे नाव आहे.
जुनेद रफीक मुश्रीफ , साकिर जलील शेख हे दोघे रविवारी राधिका कांबळे यांच्या घरा जवळ दबा धरून बसले होते. राधिका या घराबाहेर आल्यानंतर जुनेद मुश्रीफ याने कुऱ्हाडीने डोक्यात वार करत हल्ला केला. हल्ला करून जुनेद मुश्रीफ हा पळून गेला होता. तर म्हाडा कॉलनी येथील नागरिकांनी साकिर शेख याला पकडुन चोप देत पोलीसांच्या ताब्यात दिले होते. घटना स्थळावर पोलीस तात्काळ पोहचल्याने मोठा अनर्थ टळला. डोक्यात कुऱ्हाडीचा घाव बसल्याने गंभिर जखमी झालेल्या राधिका कांबळे यांना उपचारासाठी मिरज शासकीय रुग्णालय दाखल करण्यात आले आहे.
हा हल्ला करताना हल्लेखोर कॅमेरात कैद झाले आहेत. राधिका कांबळे ह्या महिलेने जुनेद मुश्रीफ यांच्यावर पूर्वी पोलिसात तक्रार दिली होती. याबाबत जुनेद मुश्रीफ वर गुन्हा ही दाखल झाला होता. या कारणावरून तिच्यावर हल्ला झाल्याचा अंदाज व्यक्त केला जात आहे. मिरज शहर पोलिसांनी साकिर शेख व जुनेद मुश्रीफ या दोघांनाही ताब्यात घेतले आहे.
