मिरज : खबऱ्या प्रतिनिधी / राष्ट्रवादीचे मिरज विधानसभा क्षेत्र अध्यक्ष आणि एमआयएम सांगली जिल्हाध्यक्षाचे कॉल रेकॉर्डिंग व्हायरल झाल्याने सर्वत्र चर्चेला ऊत आला आहे. जातीयवादी कोण ? डावललं जातय कुणाला ? हा प्रश्न मिरजकरांना पडल्याचे दिसत आहे.
सांगली जिल्ह्यातील मिरज मधील राष्ट्रवादीच्या नेत्यांच्या मधील अंतर्गत धुसपुस चव्हाट्यावर आली आहे. गंभीर आरोप एकमेकांच्यावर करण्यात आले आहेत. सुरुवातीला अंतर्गत असणारा संघर्ष आता वैयक्तिक टीकेवर येवून थांबला आहे.
“राष्ट्रवादी मधील मातंग-बौद्ध, महार समाजातील नेत्यांना डावलल जाते,” असा आरोप एमआयएम पक्षाचे जिल्हाध्यक्ष डॉ. महेशकुमार कांबळे यांनी केला. त्यानंतर राष्ट्रवादी मधील नेत्यांनी पलटवार केला.
मात्र पत्रकार परिषद घेण्याअगोदर राष्ट्रवादीचे मिरज विधानसभा क्षेत्र अध्यक्ष प्रमोद इनामदार आणि एमआयएम पक्षाचे जिल्हाध्यक्ष डॉ. महेशकुमार कांबळे यांच्यात मोबाईलवर संवाद झाला होता. डॉ. महेशकुमार कांबळे यांची एक प्रकारे परवानगी घेऊनच प्रमोद इनामदार यांनी पत्रकारांच्या समोर आपली बाजू मांडली. इनामदार मात्र फोनवर एक बोलले आणि टीका मात्र वेगळीच केली.
त्यानंतर या दोन नेत्यांच्या मधील मोबाईल वरील संभाषण सोशल मीडियावर व्हायरल होत आहे. जातीवादी नेमकं कोण आहे ? आणि कोणा -कोणाला डावललं जातय, अशा आशयाचे विषय रेकॉर्डिंग मध्ये असल्यामुळे राजकीय वर्तुळात उलट सुलट चर्चा सुरू झाल्या आहेत.
