अवैध गौण खनिज उत्खनन विरोधातील कारवाईला ब्रेक
कडेगाव तालुक्यात तपासणी करून दोषींवर कारवाईची गरज
कडेगाव:- कडेगाव तालुक्यातील काही तलाठ्यांनी अवैध गौण खनिज उत्खनन संदर्भात तहसीलदारांनी दिलेल्या आदेशाला चक्क केराची टोपली दाखवल्याची धक्कादायक माहिती समोर आली असून सुमारे चार वर्षांपूर्वी पारित केलेले आदेश फक्त वरिष्ठ अधिकाऱ्यांना दाखवायलाच केले असल्याचं स्पष्ट झालं आहे. त्यामुळं अवैध गौण खनिज उत्खनन विरोधातील कारवाई का ब्रेक लागल्याचे दिसत असून संबंधित प्रकरणात तहसीलदार व प्रांताधिकारी यांनी तात्काळ लक्ष घालून तपासणी करावी व दोषी तलाठ्यांवर शिस्त भंगाची कारवाई करावी अशी मागणी होत आहे.
अवैध गौण खनिज उत्खनन रोखण्यासाठी तहसीलदार व प्रांताधिकारी प्रत्येक वेळी प्रतिबंधात्मक पावले उचलत असतात अशीच पावले सुमारे चार वर्षांपूर्वी उचलली होती. यातून गौण खनिज उत्खनन केलेल्या लोकांचे नावे पंचनामे करून खुलासा मागवला होता. त्यानंतर खुलासा मान्य अमान्य होऊन ज्यांचा खुलासा अमान्य करण्यात आला त्यांना दंडाच्या नोटिसा देण्यात आल्या. या नोटिसना प्रतिसाद न मिळाल्याने तत्कालीन तहसीलदार व प्रांताधिकारी यांनी संबंधित व्यक्तींच्या नावावर असणाऱ्या मिळकतीवर प्रचलित कायद्यानुसार बोजा चढवण्याचे आदेश केले. मात्र त्यातील बरेच आदेश केवळ कागदोपत्री आणि वरिष्ठांना दाखवण्या पुरतेच काढण्यात आले होते की काय ? असा सवाल आता उपस्थित केला जात आहे.
देवराष्ट्रे येथील एका प्रकरणात सदर आदेशाचा अंमल न झाल्याने काही ग्रामस्थांनी तत्कालीन तलाठी यांचे विरोधात तक्रार दाखल केल्यानंतर संबंधित तलाठ्याने आदेशाची अंमलबजावणी केली होती. तहसीलदार किंवा वरिष्ठ अधिकाऱ्यांनी केलेल्या आदेशाची अंमलबजावणी करण्यात तलाठयांनी कुचराई का केली? याबाबत काडीमात्र चौकशी करण्यात आली नाही. तर आजही असे अनेक आदेश अंमलबजावणी वाचून धूळ खात पडले आहेत. वरिष्ठांच्या आदेशाला अशाप्रकारे केराची टोपली दाखवणाऱ्या तलाठ्यांवर शिस्तभंगाची कारवाई का केली जात नाही? असा सवाल आता उपस्थित केला जात आहे. विद्यमान तहसीलदार व प्रांताधिकारी धडाडीचे आहेत त्यांनी सदर प्रकरणात लक्ष घालून चौकशी करावी व दोषी तलाठ्यांवर कठोर कारवाई म्हणजे भविष्यात अशा प्रकारे वरिष्ठांच्या आदेशाला कोणीही केराची टोपली दाखवणार नाही अशी मागणी होत आहे.
