मिरज : खबऱ्या प्रतिनिधी/ शहरातील साठे चौकापासून जवळच असलेल्या एका हॉटेलमध्ये दारु पित असताना अचानकच दोघांमध्ये जोरदार वाद झाला. वादाची ठिणगी एवढी जोरात होती की, मंगळवेढा येथील ऊसतोड मजुर बापू मेटकरी याच्या डोक्यात फरशी घालून जीवे मारण्याचा प्रयत्न करण्यात आला. हल्ल्यात संबंधीत व्यक्ती जखमी झाल्याने त्याला मिरज शासकीय रुग्णालयात उपचारासाठी दाखल करण्यात आले आहे.
याबाबत माहिती मिळताच मिरज शहर पोलीस ठाण्याच्या अधिकारी व कर्मचाऱ्यांनी तातडीने घटनास्थळी धाव घेऊन परशा नामक नशेखोरास ताब्यात घेतले आहे. याबाबत रात्री उशिरापर्यंत गुन्हा दाखल करण्याचे काम सुरू होते.
घटनास्थळावरुन मिळालेली अधिक माहिती अशी, संबंधीत जखमी व्यक्ती सोमवारी रात्री साडेसात वाजण्याच्या सुमारास अण्णाभाऊ साठे चौका जवळील एका हॉटेलमध्ये दारु पिण्यासाठी आला होता. याच हॉटेलमध्ये परशा नामक नशेखोरही दारु पित बसला होता. परशा याने दारुच्या नशेत बापूच्या खिशात हात घालून पैसे काढून घेण्याचा प्रयत्न करीत होता. यावेळी बापू आणि परशा या दोघांमध्ये बाचाबाची झाली. दोघेही भांडत एकमेकांना शिवीगाळ करत हॉटेलच्या बाहेर आले. यावेळी एकमेकांवर धावून जात असताना परशा याने हॉटेलसमोर असलेली ब्लॉकची फरशी घेऊन बापू याच्या डोक्यात मारली. त्यामुळे प्रचंड रक्तस्त्राव होऊन संबंधीत तरुण जखमी झाला.
याबाबत माहिती मिळताच मिरज शहर पोलिस ठाण्याचे निरीक्षक संजीव झाडे यांच्यासह पोलिस कर्मचारी घटनास्थळी दाखल झाले. जखमी तरुणास तातडीने मिरज शासकीय रुग्णालयात दाखल करण्यात आले. संशयीत हल्लेखोर परशा नामक नशेखोरास ताब्यात घेतले. घटनास्थळाचा पंचनामा करुन चौकशीनंतर गुन्हा दाखल करण्याचे काम रात्री उशिरापर्यंत सुरू होते.
