मिरज; खबऱ्या प्रतिनिधी : मिरज – लिंगनूर रस्त्यावर झाडावर मोटारसायकल आदळल्याने सुमित रमेश गुरव (वय 23, रा. लिंगनूर) या तरुणाचा मृत्यू झाला. रुग्णवाहिका वेळेत उपलब्ध न झाल्याने संबंधिताचा मृत्यू झाला असल्याचा आरोप नातेवाईकांनी केला आहे.
याबाबत अधिक माहिती अशी की, सुमित गुरव हा मोटारसायकल वरून लिंगनूरकडे निघाला होता. त्याचा मोटरसायकल वरील ताबा सुटल्याने मोटारसायकल थेट झाडावर जाऊन आदळली. अपघातात गंभीर जखमी झालेला सुमित हा रस्त्याकडेला सुमारे तासभर रक्ताच्या थारोळ्यात पडला होता. रस्त्यावरून येणाऱ्या जाणाऱ्या ग्रामस्थांनी रुग्णवाहिकेला फोन करून माहिती दिली. अपघाताची माहिती मिळताच सुमित याच्या मित्रांनी व नातेवाईकांनी देखील तातडीने घटनास्थळी धाव घेतली. परंतु वेळेत रुग्णवाहिका न आल्याने सुमित याला एका टेम्पोमध्ये घालून उपचारासाठी मिरज शासकीय रुग्णालयात दाखल करण्यात आले. परंतु उपचारापूर्वीच सुमित याचा मृत्यू झाला.
वेळेत रुग्णवाहिका उपलब्ध झाली असती तर सुमितवर उपचार करून त्याचे जीव वाचले असते. वेळेत रुग्णवाहीका उपलब्ध न झाल्यानेच सुमित याचा मृत्यू झाला असल्याचा आरोप त्याच्या नातेवाईकांनी केला आहे. शवविच्छेदन करून मृतदेह नातेवाईकांच्या ताब्यात देण्यात आला असून याबाबत मिरज ग्रामीण पोलिस ठाण्यात नोंद करण्यात आली आहे.
