कुपवाड : कुपवाड (ता. मिरज जि. सांगली) येथील रवींद्र नारायण नरळे (वय 39, रा.अहिल्यानगर, न्यू विजयनगर) या भारतीय सैन्यातील जवानाचे पाणागड राज्य-पश्चिम बंगाल येथे सेवा बजावताना अकस्मात निधन झालं. नरळे आर्मी मेडिकल कोअर (AMC) 189 मिलीटरी हॉस्पिटल पाणागड येथे नाईक या पदावर सेवा बजावत होते.
याबाबत त्यांच्या कुटुंबीयांकडून मिळालेली माहिती अशी, मयत जवान रवींद्र नरळे मुळ गोंधळेवाडी ता. जत, जि. सांगलीचे आहेत. कुपवाड (ता. मिरज) येथील अहिल्यानगर, न्यू विजयनगर कुपवाड भागात कुटुंबीयांसह वास्तव्य करत होते. कारखाना परिसरातील शांतीनिकेतन विद्यालयामध्ये त्यांनी इयत्ता दहावी पर्यंतचं शिक्षण घेतलं. त्यानंतर सन 2005 साली ते भारतीय सैन्यदलात भरती झाले.
श्रीनगर (जम्मू काश्मीर), पुणे (महाराष्ट्र), जालंदर (पंजाब), जोशी मठ (उत्तराखंड), पाणागड (पश्चिम बंगाल) या विविध ठिकाणी त्यांनी भारतीय सैन्यदलात सतरा वर्षे दीर्घकाळ सेवा बजावली. पश्चिम बंगालच्या पाणागड येथे सेवा बजावत असताना त्यांच्या अकस्मात निधनाची घटना घडली. घटनेची माहिती रविवारी जवान नरळे यांच्या कुटुंबीयांना मिळताच त्यांनी नातेवाईकांसह आक्रोशाचा हंबरडा फोडला. कुटुंबीयांची भेट घेण्यासाठी परिसरातील नागरिकांनी गर्दी केली. त्याचे पार्थिव पाणागडहून पाठविण्यात आलं असून मंगळवारी अंत्यविधीसाठी सांगली येथे दाखल होणार आहे, अशी माहिती नातेवाईकांनी दिली.
आई मी सुट्टीवर येणार आहे’
सेवा बजावत असताना निधन झालेल्या जवान रवींद्र नरळे यांनी शनिवारी आपल्या आईशी फोनवरून संवाद साधला. पाच ते सहा महिन्यांपासून घरी परतण्याची वाट पाहणाऱ्या आईला त्यांनी फोनवरून दिलासा दिला होता. त्यावेळी ते म्हणाले ‘आई मी लवकरच सुट्टीवर येणार आहे तू काळजी करू नकोस. सांगलीला येण्यासाठी गाडीमध्ये बसताच मी तुला फोन करेन’ जवान नरळे यांचा त्यांच्या आईशी तो शेवटचा फोन होता.
