उस्मानाबाद : पोलीस अधीक्षक कार्यालयातच दोन पोलीस कर्माचाऱ्यांमध्ये हाणामारी झाल्याचा धक्कादायक प्रकार उघडकीस आला आहे.
धक्कादायक बाब म्हणजे कार्यालयीन अधीक्षकांनेच लिपिकाला लाथाबुक्क्यांनी मारहाण केली. सदरील प्रकार उस्मानाबाद (Osmanabad Crime News) जिल्ह्यातून समोर आला आहे. कार्यालयीन अधीक्षक नरसिंग कासेवाड यांनी कार्यालयातील वरिष्ठ श्रेणी लिपिक मच्छिंद्र कृष्णा जाधव यांना मारहाण केल्याचा आरोप आहे. या प्रकरणी आनंद नगर पोलीस ठाण्यात गुन्हा दाखल करण्यात आला आहे.
अंतर्गत शिस्तीसाठी पोलीस दल प्रख्यात आहे. मात्र, गेल्या काही दिवसांपासून अंतर्गत बेशिस्तपणा वाढल्याचे दिसत आहे. उस्मानाबाद जिल्ह्यात असाच प्रकार बुधवारी घडला. केवळ निनावी अर्ज मागितल्याच्या कारणावरून पोलीस अधीक्षक कार्यालयातील कार्यालयीन अधीक्षकाने लिपिकाला लाथा, बुक्क्यांनी मारहाण करत जिवे मारण्याची धमकीही दिली. कार्यालयीन अधीक्षक नरसिंग लक्ष्मण कासेवाड यांनी वरिष्ठ श्रेणी लिपिक मच्छिंद्र कृष्णा जाधव यांना आपल्या कक्षात बोलावून घेतले.
एलसीबीत बदली झालेल्या एका पोलीस कर्मचाऱ्याच्या विरोधात आलेल्या तक्रारीबाबत जबाब देण्यास सांगितले. जाधव यांनी त्यांना निनावी अर्जाची व पत्राची मागणी केली. तेव्हा कासेवाड यांनी भडकून जाधव यांना शिविगाळ व अश्लिल भाषेत बोलण्यास सुरुवात केली. आयजी साहेबांना तुझ्या विरोधात भडकावून तुझी वाट लावतो, तुला जिवंत सोडणार नाही, अशीही धमकी देत लाथा बुक्क्यांनी मारहाण केली. घडलेला सर्व प्रकार जाधव यांनी हा प्रकार अप्पर पोलीस अधीक्षक व उपविभागिय पोलीस अधिकाऱ्यांनाही सांगितला. त्यानंतर त्यांनी आनंदनगर पोलिस ठाण्यात फिर्याद दिली. याप्रकरणी गुन्हा दाखल करण्यात आला आहे.
