नृसिंहवाडी प्रतिनिधी | गोपनीय खबऱ्या
कोल्हापूर, सांगली आणि सातारा जिल्ह्यांत झालेल्या दमदार पावसामुळे कृष्णा नदीला पूर आला आहे. श्री क्षेत्र नृसिंहवाडी येथील दत्त मंदिरात आज (मंगळवार) पहाटे ३:३० वाजता चालू वर्षातील पहिला ‘दक्षिण द्वार सोहळा’ भक्तिमय वातावरणात संपन्न झाला.
रात्रीत नदीची पाणीपातळी सुमारे ५ फुटांनी वाढल्याने उत्तरेकडून वाहणारे कृष्णेचे पाणी श्रींच्या चरणकमलांना स्पर्श करून दक्षिण द्वारात प्रविष्ट झाले. या पवित्र सोहळ्याची माहिती मिळताच कोल्हापूर, सांगलीसह परिसरातील हजारो भाविकांनी नृसिंहवाडीकडे धाव घेतली. मंदिर परिसर ‘श्री गुरुदेव दत्त’च्या जयघोषाने दुमदुमून गेला असून भाविकांनी पवित्र स्नान व दर्शनाचा लाभ घेतला.
सुरक्षेसाठी देवस्थानतर्फे जादा सुरक्षा रक्षक तैनात करण्यात आले आहेत. मुख्य मंदिरात पाणी आल्यामुळे श्रींची उत्सवमूर्ती सध्या दर्शनासाठी प.पू. श्री नारायण स्वामी मंदिरात ठेवण्यात आली आहे.
