खास प्रतिनिधी | गोपनीय खबऱ्या
निवडणुकांचा रणसंग्राम सुरू आहे. स्थानिक स्वराज्य संस्थांच्या निवडणुकीमध्ये महानगरपालिकेच्या निवडणुका नुकत्याच पार पडल्या. यामध्ये उद्धव ठाकरेंच्या सेनेला दणका मिळाल्याचे स्पष्ट झाले. जिल्हा परिषद व पंचायत समिती निवडणूकांसाठी आता मैदान तापू लागले आहे. उबाठा सेनेला मिळालेले अपयश व शिंदे सेनेला मिळालेले यश पाहता, निकालाच्या दुसऱ्याच दिवशी मिरज तालुक्यात उद्धवसेनेला जोरदार धक्का मिळाल्याचे चित्र दिसत आहे.
उद्धव बाळासाहेब ठाकरे सेनेचे भोसे जिल्हा परिषद गटाचे विभागप्रमुख, उपविभागप्रमुख यांच्यासह इतर पदाधिकारी व शेकडो कार्यकर्त्यांनी शिंदेसेनेत प्रवेश केल्याने शिंदेसेनेला बळ मिळाले आहे.
उद्धव बाळासाहेब ठाकरे शिवसेनेमध्ये सोनी गावचे श्री. सागर सुरेश नरुटे हे भोसे जिल्हा परिषद गटाचे विभागप्रमुख व मानमोडी गावचे उपसरपंच श्री. रामचंद्र शिवाजी साळुंखे हे उपविभागप्रमुख होते. त्यांनी १२ गावांमध्ये कार्यकर्त्यांची बांधणी केली असून युवा कार्यकर्त्यांची फौज मोठी आहे.
शनिवारी सायंकाळी शिवसेनेचे जिल्हाप्रमुख बजरंग पाटील, महानगरप्रमुख प्रा. मोहन वनखंडे, नवनिर्वाचित नगरसेवक युवा नेते सागर वनखंडे, ज्येष्ठ नेते शंकर शिंदे, कवलापूरचे युवा नेते पै. मोहन शिंदे यांच्या उपस्थितीत नरुटे व साळुंखे यांनी कार्यकर्त्यांना घेऊन प्रवेश केला.
यावेळेस जिल्हा परिषद व पंचायत समितीच्या निवडणुकीत जोरदार ताकद लावून शिवसेनेला मोठे मताधिक्य मिळवून देऊन विजयी करणार असल्याचे भोसे जिल्हा परिषद गटाचे नेते सागर नरुटे व रामचंद्र साळुंखे यांनी सांगितले.
