खास प्रतिनिधी | गोपनीय खबऱ्या
भरधाव एसटीने काल एका तरूणीला चिरडले. या अपघाताला बारा तासही उलटले नाहीत, तोवर आज पुन्हा त्याच रस्त्यावर भरधाव एसटीने एका दुचाकीस्वारास उडवले. रात्री साडेदहाच्या सुमारास सिव्हिल चौकात हा अपघात झाला. या अपघातात दुचाकीस्वार वैभव गुरूदत्त कोळी (वय २१, हनुमान कॉलनी, सांगली) हा जखमी झाला असून शासकीय रुग्णालयात उपचार सुरू आहेत.
अधिक माहिती अशी, की सिव्हिल चौक ते स्टँड रस्त्यावर चोवीस तास वर्दळ असते. काल सकाळी जय मातृभूमी व्यायाम मंडळानजीक शर्वरी राजकुमार कुलकर्णी या तरूणीस एसटीने चिरडले. या अपघातानंतर हळहळ व्यक्त करण्यात आली.
प्रशासनाविरोधात संतापाची लाट जनमाणसातून उमटली. त्यानंतर पालिकेने आज अतिक्रमण हटवण्याचा एका फार्स सकाळी केला. रस्त्यावरील अतिक्रमणे हटवण्याची नौटंकी केली आणि यंत्रणा तशीच राहिली. आज रात्री राममंदिर चौकातून वैभव कोळी हा दुचाकी (एमएच १० सीई ९४२३) वरून सिव्हिल हॉस्पिटलच्या दिशेने निघाला होता. त्यावेळी बसस्थानकातून कोल्हापूर-माजलगाव एसटी (एमएच २० बीएट २७४०) भरधाव वेगाने येत होती. त्यात प्रवाशांची संख्याही अधिक होती.
सिव्हिल चौकात रात्री साडेदहाच्या सुमारास भरधाव एसटीने कोळी याच्या दुचाकीला जोराची धडक दिली. त्याला काही अंतर फरफटत नेले. त्यानंतर चालकाने एसटी थांबवली. तोवर नागरीकांची मोठी गर्दी परिसरात जमा झाली. जखमी कोळी याला उपचारासाठी दाखल करण्यात आले. प्रवाशी आणि बघ्यांची मोठी गर्दी परिसरात होती. विश्रामाबग पोलिसही घटनास्थळी दाखल झाले होते. दरम्यान, या घटनाची रात्री उशीरापर्यंत नोंद झाली नव्हती.
