खास प्रतिनिधी | गोपनीय खबऱ्या
मिरज पंढरपूर रोडवर ४२ गाईच्या वासरांची कत्तलीसाठी वाहतूक करणारी पिकअप शिवप्रतिष्ठान हिंदुस्थानच्या गोरक्षा समितीच्या कार्यकर्त्यांनी शुक्रवारी पहाटे पकडली आहे. यामध्ये गाईच्या वासरांना तोंड बांधून, दाटीवाटीने नेणाऱ्या एकाला मिरज शहर पोलिसांनी ताब्यात घेतले आहे.
सदर वाहतुकीवेळी २ वासरे ही मृतपावली असल्याचे निदर्शनास आले. त्यातील एका वासराला वाहतुकीच्या दरम्यान मारण्यात आल्याचा आरोप शिवप्रतिष्ठान हिंदुस्थानच्या कार्यकर्त्यांनी केला आहे. आगामी बकरी ईदच्या निमित्ताने गाईची अथवा गाईच्या वासरांची कत्तल होऊ नये, यासाठी शिवप्रतिष्ठान हिंदुस्थानच्या गोरक्षा समितीच्या कार्यकर्त्यांनी कत्तलीसाठी नेणाऱ्या गाई आणि वासरांच्या वाहतुकीवर आळा घालण्यासाठी गस्त घालत असताना खास बातमीदारामार्फत मिळालेल्या माहितीनुसार, एक जण गाईच्या वासरांची वाहतूक करत असल्याची माहिती मिळाली.
मिळालेल्या माहितीनुसार, गोरक्षा समितीच्या कार्यकर्त्यांनी मिरज पंढरपूर रस्त्यावर सदरची पिकअप पकडली. पिकअपमध्ये गाईची वासरे दाटीवाटीने तोंड बांधून,निर्दयपणे वाहतूक करताना आढळली. त्यानुसार वाहन गोरक्षा समितीच्या कार्यकर्त्यांनी पकडून मिरज शहर पोलिसांच्या ताब्यात दिली. सदरचे वाहन आणि गाईची वासरे ही मिरज शहर पोलीस ठाण्यात आणण्यात आली. चालकाला पोलिसांच्या ताब्यात देण्यात आले. याबाबत संबंधित पिकअप चालक आणि संबधीत एकावर मिरज शहर पोलिसांत गुन्हा दाखल करण्यात आला आहे. तर याबाबत शिवप्रतिष्ठान हिंदुस्थानच्या वतीने आगामी बकरी ईदच्या पार्श्वभूमीवर गाई तसेच गाईच्या वासरांची कत्तल होऊ नये, यासाठी सर्वच हिंदुत्ववादी संघटनांनी गस्त घालून गाईची आणि वासरांची कत्तलीसाठी होणारी वाहतूक थांबवावी, असे आवाहन शिवप्रतिष्ठान हिंदुस्थान चे मिरज शहर प्रमुख विनायक माईंनकर यांनी केले आहे.याबाबतची माहिती शुक्रवारी पहाटे ६ वाजता शिवप्रतिष्ठान हिंदुस्थानकडून देण्यात आली आहे.
