सांगली प्रतिनिधी | गोपनीय खबऱ्या
मुख्यमंत्री कार्यालयाकडून राबवण्यात येणाऱ्या १०० दिवस कृती कार्यक्रम अंतर्गत शासकीय कामकाज गतिमान व्हावे यासाठी सुरू असलेल्या अभियानांतर्गत सांगली मिरज कुपवाड शहर महानगरपालिका आणि अप्पर तहसील कार्यालय, सांगली यांच्या संयुक्त विद्यमानाने पंतप्रधान आवास योजनेच्या घरकुल लाभार्थ्यांना मोफत वाळू वाटप करण्यात आले.
यावेळी अप्पर तहसील कार्यालयामार्फत अनाधिकृत वाहतूक करणाऱ्या गाड्यांवरती केलेल्या कारवाईमध्ये अंदाजे ९ ब्रास वाळू जप्त करण्यात आली होती. महानगरपालिकेमार्फत पंतप्रधान घरकुल आवास योजनेअंतर्गत मंजूर लाभार्थ्यांना मोफत वाळू वाटप देण्याची मागणी प्राप्त झाली होती. त्या अनुषंगाने अप्पर तहसील कार्यालयामार्फत आणि जिल्हाधिकारी अशोक काकडे व उपविभागीय अधिकारी उत्तम दिघे यांच्या मार्गदर्शनाखाली अप्पर तहसील कार्यालय, सांगली यांचेकडून तीन घरकुल लाभार्थ्यांना प्रत्येकी पाच ब्रास वाळू गुरुवारी मोफत देण्यात आली.
यावेळी अप्पर तहसीलदार अश्विनी वरुटे, नायब तहसीलदार मनोहर पाटील, सहाय्यक महसूल अधिकारी सुधाकर जाधव, चंदनशिवे, ग्राम महसूल अधिकारी अश्फाक मुनावर, सागर शिंदे ,समाजविकास तज्ञ मनपा सांगली, विहांग वाघमारे सिव्हिल इंजिनियर राजेंद्र गोंधळे स्वच्छता निरीक्षक, अभिषेक सुर्यवंशी व घरकुल योजनेचे लाभार्थी उपस्थित होते.
सांगली मिरज कुपवाड शहर महानगरपालिकेमार्फत आम्हाला पंतप्रधान आवास योजनेअंतर्गत घरकुल मंजूर झालेले आहे. या बांधकामासाठी आम्हाला तहसील कार्यालयामार्फत मोफत वाळू उपलब्ध होत आहे. या नावीन्यपूर्ण उपक्रमाबाबत आम्ही महाराष्ट्र शासनाचे आभार व्यक्त करतो – घरकुल लाभार्थी
