मिरज रेल्वे जंक्शनजवळ इंधन वाहून नेणारी रिकामी वॅगन शुक्रवारी दुपारी रुळावरून घसरली. मुख्य रेल्वे मार्गावरच हा अपघात झाल्यामुळे मिरज ते पुणे रेल्वेमार्गावरील रेल्वे वाहतूक चार तास ठप्प होती.
रुळावरून घसरलेली वॅगन बाजूला करून सायंकाळी या मार्गावरील रेल्वे वाहतूक सुरळीत सुरू करण्यात आली.
मिरज रेल्वे स्थानकातून पुण्याच्या दिशेने इंधन वाहून नेणारी रिकामी वॅगन निघाली होती. मिरज जंक्शनमधून ही वॅगन वाहेर पडल्यानंतर शुक्रवारी दुपारी तीन वाजण्याच्या सुमारास मुख्य मार्गावरून जात असताना रेल्वे रुळावरून ही वॅगन घसरली. रेल्वे रुळावरून वॅगन घसरून देखील इंजिन पायलटला याची कल्पना नव्हती. यावेळी इंजिन मेन्टेनन्स इंजिनिअर साळुंखे या रेल्वे कर्मचार्याच्या निदर्शनास ही बाब आली. त्यांनी तातडीने लाईनमनला याबाबत सूचना केली. त्यानंतर तातडीने सिग्नल देऊन रेल्वे थांबविण्यात आली.
दरम्यान, घसरलेल्या स्थानकापासून तशीच वॅगन पुढे गेल्याने रेल्वे इंधन वॅगन आणि रेल्वे मार्गाचे मोठे नुकसान झाले. इंधन वॅगनची चाके तुटून दुसर्या बाजूला झाली. अपघाताची माहिती मिळताच सर्व रेल्वे अधिकारी, कर्मचारी घटनास्थळी दाखल झाले. अपघातात मुख्य रेल्वे मार्गाचे नुकसान झाल्याने मिरज ते पुणे रेल्वे मार्गावरील रेल्वे वाहतूक सुमारे चार तास ठप्प होती. त्यामुळे कोल्हापूर ते गोंदिया महाराष्ट्र एक्स्प्रेस मिरज रेल्वे जंक्शनवर, तर सांगली-बेंगलोर राणी चेन्नम्मा एक्स्प्रेस सांगली स्थानकात थांबविण्यात आली होती.
- संबंधित वॅगनला गार्डच नव्हता?
मिरजेतून पुण्याकडे निघालेल्या रिकाम्या इंधन वॅगनला गार्डच नसल्याचे सांगण्यात आले. गार्ड नसल्यामुळे वॅगन रुळावरून घसरल्याची कल्पनाच पायलटल आली नव्हती. रेल्वे कर्मचार्यांच्या सतर्कतेमुळे मोठा अनर्थ टळला.
