सांगली : ‘शहरातील त्रिमूर्ती चौकातील हत्तीच्या प्रतिकृतीची मोडतोड करण्यात आली. पोलिसांनी संशयिताला अटक करून त्याच्यावर कारवाई करावी,’ अशी मागणी हिंदू एकता आंदोलनतर्फे करण्यात आली.
त्रिमूर्ती चौकाचे सुशोभीकरण करून तेथे बबलू हत्तीची फायबरची सात फूट उंचीची प्रतिकृती उभारली होती. त्याची परिसरातील नागरिक मनोभावे पूजा करत. लहान मुलांचे आकर्षण होते. महिन्यापूर्वी हनुमान नगरमध्ये राहणाऱ्या एकाने रात्रीच्या सुमारास प्रतिकृतीची मोडतोड केली. हत्तीचा कान मोडला. सीसीटीव्ही फुटेजमध्ये संबंधित मोडतोड करताना दिसत आहे.
चौकाचे ज्यांनी सुशोभीकरण केले, ते रवींद्र केंपवाडे विश्रामबाग पोलिस ठाण्यात तक्रार दाखल करण्यास गेले असता तक्रार दाखल करून घेतली गेली नाही. शाखा अभियंत्यांच्या तक्रारीनुसार किरकोळ स्वरुपाची कारवाई करून संशयिताला सोडून देण्यात आले.
हत्तीच्या प्रतिकृतीची मोडतोड करणाऱ्यांवर कायदेशीर कारवाई करून गुन्हा दाखल करावा. त्याने अन्यत्र अशा प्रकारचे कोणते कृत्य केले आहे का, याचीही चौकशी करावी.
अन्यथा संशयिताच्या घरावर ‘हिंदू एकता आंदोलन’ मोर्चा काढेल, असा इशारा शहर-जिल्हाध्यक्ष संजय जाधव, जिल्हा उपाध्यक्ष राजू जाधव, ग्रामीण जिल्हाध्यक्ष विष्णू पाटील, प्रकाश चव्हाण, दत्तात्रय भोकरे, सोमनाथ गोटखिंडे, मनोज साळुंखे, रवी वादवणे, अविनाश मोहिते, उदय मुळे यांनी दिला.
