Sangli Crime News : सांगली येथील माहिती अधिकार कार्यकर्ते संतोष कदम यांच्या खून प्रकरणी पोलिसांनी तिघांना अटक केली होती. या अटकेनंतर संतोष यांच्या हत्येचे काही राजकीय कनेक्शन आहे का, याचा तपास पोलिस करत आहेत.
पोलिसांनी खूनप्रकरणी सांगलीचे माजी नगरसेवक मंगेश चव्हाण, बाळू गोंधळेंसह तिघांची इचलकरंजी पोलिस उपअधीक्षक कार्यालय आणि कुरुंदवाड पोलिसांतर्फे दोन तास कसून चौकशी केली.
दरम्यान, चौकशीसाठी त्यांना नोटीस देण्यात आली होती. त्यांचा जबाब नोंदवून घेऊन पुन्हा चौकशीसाठी बोलविण्यात येईल. त्यावेळी हजर राहण्याची नोटीस त्यांना दिली आहे, अशी माहिती सहाय्यक निरीक्षक रवीराज फडणीस यांनी दिली.
संतोष कदम यांच्या खूनप्रकरणी त्यांचा पुतण्या प्रफुल्ल कदम याने फिर्याद दिली आहे. माजी नगरसेवक मंगेश चव्हाण, पप्पू चव्हाण, बाळू गोंधळे, कुशल कुदळे, सिद्धार्थ कुदळे व अन्य तीन ते चार संशयितांनी संतोष कदम यांच्यावर या आधी हल्ला केला होता.
यासाठी 28 ऑक्टोबर 2022 रोजी त्यांच्यावर सांगली पोलिसांत गुन्हा दाखल केला होता. संतोष कदमला माजी नगरसेवक चव्हाण व अन्य संशयितांविरोधात दिलेली तक्रार मागे घेण्यासाठी वेगवेगळ्या लोकांचे धमकीचे फोन येत असल्याबाबत संतोष कदमने याने दिलेल्या फिर्यादीत म्हटले आहे.
त्यानुसार पोलिसांनी माजी नगरसेवक चव्हाण, गोंधळेंसह पाचजणांना मंगळवारी (ता.13) सकाळी दहा वाजता कुरुंदवाड पोलिसांत जबाबासाठी बोलावले होते. दुपारनंतर इचलकरंजी येथील कार्यालयात पोलिस उपअधीक्षक समीरसिंह साळवे यांच्यातर्फेही त्यांची चौकशी करण्यात आली.
9 फेब्रुवारीला कुरुंदवाड नांदणी रोडवर निळ्या रंगाच्या स्विफ्ट कार मध्ये रक्ताने माखलेल्या अवस्थेत मृतदेह आढळून आला होता. एका शेतकऱ्याच्या ही गोष्ट लक्षात येताच पोलिसांना त्याची माहिती देण्यात आली होती. पोलिसांनी पाहणी केल्यानंतर सांगलीतील माहिती अधिकार कार्यकर्ते संतोष कदम यांचा मृतदेह असल्याचे निष्पन्न झाले होते.
