तीर्थक्षेत्र गुड्डापुर मंदिरात घुसले पाणी.., दुष्काळी जतमध्ये सर्वाधिक पाऊस..!

सांगली : सांगली जिल्ह्यात गेले दाेन दिवसांपासून पावसान हजेरी लावल्याने विविध तालुक्यांतील नाले भरुन वाहू लागले आहेत.

जत तालुक्यात पावसामुळे काही भागात पाणी साचले आहे. तसेच गुड्डापुर मंदिर परिसरात पावसाची पाणी घुसल्याने भाविकांची तारांबळ उडाली आहे.

सांगली जिल्ह्यात गुरुवारी सर्वाधिक पाऊस जत या दुष्काळी भागात झाला. जिल्ह्यात गत 24 तासात सरासरी 52.8 मिली मीटर पावसाची नोंद झाली आहे. यामध्ये जत तालुक्यात 93.4 मिली मीटर पावसाची नोंद झाली आहे. याबराेबरच मिरज 71.4 (मिली मीटर), खानापूर-विटा 38, वाळवा-इस्लामपूर 33.5, तासगाव 55.6, शिराळा 21.04, आटपाडी 24.8, कवठेमहांकाळ 86.9, पलूस 46.7, कडेगाव 17.8 मिली मीटर इतका पाऊस झाला आहे.

तीर्थक्षेत्र गुड्डापुर मंदिरात घुसले पाणी

महाराष्ट्र, कर्नाटक, आंध्र प्रदेश मधील लाखो भाविकांचे श्रद्धास्थान असणारे सांगली जिल्ह्यातील जत तालुक्यातील गुड्डापुर परिसरात गुरुवारी दुपार पासून झालेल्या मान्सून पूर्व पावसाने मंदिर आवारात मोठ्या प्रमाणात पाणी घुसले. या मंदिराच्या प्रदक्षिणा मार्गावर गुढघाभर पाणी साचले आहे. येथे दर्शनासाठी आलेल्या अनेक भाविकांनी पाण्यात पोहण्याचा आनंद घेत देवीचे दर्शन घेतले.