खास प्रतिनिधी | गोपनीय खबऱ्या
सांगली जिल्ह्यातील दोन तरुणांना अटक करून त्यांच्याजवळून दोन गावठी पिस्तूल व चार जिवंत काडतुसे जप्त करण्यात आली आहेत.
शनिवारी मध्यरात्रीनंतर केएलई हॉस्पिटल पुढील बेळगाव कत्रीवर माळमारुती पोलिसांनी ही कारवाई केली आहे. याबाबत माहिती अशी की, केए २५ एमडी ६३०१ क्रमांकाच्या कारमधून आलेल्या सांगली जिल्ह्यातील दोन तरुणांना ताब्यात घेऊन त्यांच्याजवळील बॅग तपासली असता या बॅगमध्ये गावठी पिस्तूल आढळून आली. त्यामुळे लगेच त्यांना अटक करण्यात आली. मार्केटचे एसीपी संतोष सत्यनाईक यांच्या मार्गदर्शनाखाली माळमारुतीचे पोलीस निरीक्षक बी. आर. गड्डेकर, उपनिरीक्षक होन्नाप्पा तळवार व त्यांच्या सहकाऱ्यांनी ही कारवाई केली आहे. रविंद्र नाईक (वय ३७) रा. मिरज, जि. सांगली, शाहीद रईसमोहम्मद पटेल (वय २१) राहणार आरग, ता. मिरज, जि. सांगली अशी अटक करण्यात आलेल्यांची नावे आहेत.
रविंद्र व शाहीदजवळून दोन कंट्री पिस्तूल, चार जिवंत काडतुसे, ८ जीबीचे मेमरी कार्ड, एक आयफोन, एक कि-पॅड मोबाईल, पिस्तूल ठेवण्यासाठी वापरलेली स्कूल बॅग व कार जप्त करण्यात आली आहे. या दोघा जणांवर भारतीय न्याय संहिता कलम ६१ (१ ), सहकलम ३(५) व भारतीय शस्त्रास्त्र कायदा १९५९ च्या कलम २५(१ए), २९(ए) व (बी) अन्वये एफआयआर दाखल करण्यात आला आहे. या पथकात पोलीस उपनिरीक्षक श्रीशैल हुळगेरी, पोलीस उपनिरीक्षक उदय पाटील, पोलीस उपनिरीक्षक पी. एम. मोहिते, साहाय्यक पोलीस उपनिरीक्षक बी. एफ. बस्तवाड, अरुण कांबळे, सी. आय. चिगरी, मारुती कुरेर, के. बी. गौराणी, सी. जे. चिन्नाप्पगोळ, मल्लिकार्जुन गाडवी, महेश वडेयर, प्रकाश कोन्नण्णावर, गोपाल लठ्ठी, दीपक बिचगत्ती व तांत्रिक विभागाचे रमेश अक्की, महादेव काशिद आदी अधिकारी व पोलिसांचा समावेश आहे. ही पिस्तूल कोठे नेण्यात येत होती? याची चौकशी करण्यात येत आहे.
