महाराष्ट्र राज्यात सध्या विधानसभा निवडणुक सुरु आहेत. काँग्रेस पक्ष मोठ्या ताकदीने जोरदार रणांगणात उतरला आहे. अशातच विविध ठिकाणी प्रचार सभा व बैठकांचे नियोजन सुरु आहे. राज्यात महाविकास आघाडीने महायुतीला आसमान दाखवण्याची तयारी केली असल्याचे नेत्यांकडून सांगण्यात येत आहे. याच धर्तीवर मिरजेतील काँग्रेस नेते प्रा. मोहन वनखंडे यांनी मिरज विधानसभा निवडणूक लढविणार असल्याचे स्पष्ट केले होते. परंतु, मतदार संघ शिवसेनेला सोडण्यात आल्याने प्रा. वनखंडे यांनी उमेदवारी अर्ज माघार घेत महाविकास आघाडीचे उमेदवार तानाजीराव सातपुते यांना पाठिंबा दिला.
महाराष्ट्र काँग्रेसचे प्रभारी रमेश चेन्नीथला यांच्या मान्यतेनुसार तसेच काँग्रेसचे प्रदेशाध्यक्ष नानाभाऊ पटोले यांच्या आदेशाने प्राध्यापक मोहन वनखंडे यांची महाराष्ट्र प्रदेश काँग्रेस कमिटीच्या उपाध्यक्षपदी नियुक्ती करण्यात आली आहे. भाजप सोडून काँग्रेसमध्ये जाणाऱ्या, नाराज न होता पुन्हा उभारी घेत कामाला लागणाऱ्या प्राध्यापक मोहन वनखंडे यांना अखेर काँग्रेस पक्षाने न्याय दिलाय. प्राध्यापक वनखंडे यांच्या या नियुक्तीमुळे काँग्रेस पुन्हा एकदा मोठ्या ताकतीने सांगली जिल्ह्यात उतरणार असल्याचे दिसून येत आहे. लढणार नसल्याचे कळाल्यानंतर कार्यकर्ते नाराज होते पण आता मात्र जल्लोष साजरा करीत आहेत. या निवडीमुळे कार्यकर्त्यांच्यामध्ये उत्साह निर्माण झाला आहे.
