मिरज प्रतिनिधी | शहरातील वैरण बाजार परिसरात असणार्या एका तीन मजली किराणा दुकानाला भीषण आग लागली. या आगीत किराणा दुकान पूर्णपणे भस्मसात झाले. अग्निशमन दलाच्या आठ गाड्यांकडून आग विझवण्याचे शर्थीचे प्रयत्न रात्री उशिरापर्यंत सुरू होते.
मिरजेतील वैरण बाजार परिसरामध्ये मुन्ना भोजमुलानी यांचे किराणा मालाचे दुकान आहे. भोजमुलानी हे सोमवारी रात्री नऊ वाजण्याच्या सुमारास दुकान बंद करून घरी गेले होते. परंतु या दुकानाला सव्वानऊ वाजण्याच्या सुमारास शॉर्ट सर्किटमुळे आग लागली.
काही क्षणात आग भडकली. त्यामुळे तीन मजली किराणा दुकान क्षणार्धात आगीच्या भक्ष्यस्थानी पडले. आगीची माहिती मिळताच अग्निशमन दल, महावितरण आणि पोलिसांनी तातडीने घटनास्थळी धाव घेतली. महावितरण कडून तातडीने परिसरातील विद्युत पुरवठा खंडित करण्यात आला. महापालिकेच्या अग्निशमन विभागाकडील सांगली आणि मिरजमधील आठ अग्निशमन दलाच्या गाड्यांकडून आग विझवण्याचे सुमारे दोन तास शर्थीचे प्रयत्न सुरू होते. परंतु तीन मजली दुकानात दुसर्या व तिसर्या मजल्यावर जाण्यासाठी अत्यंत अरुंद रस्ता असल्यामुळे अग्निशमन विभागाला आग आटोक्यात आणण्यासाठी अनेक अडचणींचा सामना करावा लागला.
भोजमुलानी यांच्या किराणा दुकानात किराणा माला सह खाद्यतेलाचा मोठ्या प्रमाणात साठा होता. त्यामुळे तळमजल्यावर असणार्या किराणा दुकानात शॉर्ट सर्किटमध्ये लागलेली आग दुसर्या आणि तिसर्या मजल्यावर असणार्या तेलाच्या साठ्यापर्यंत क्षणार्धात पसरली. दुसर्या आणि तिसर्या मजल्यावर असणार्या तेलाच्या साठ्यामुळे आग मोठ्या प्रमाणात भडकली. त्यामुळे दुकानातील सर्व किराणामाल जळून खाक झाला. त्यामुळे किराणा मालाचे मोठ्या प्रमाणात नुकसान झाले आहे.
- अग्निशमन दलाच्या आठ गाड्या घटनास्थळी
मिरजेतील आगीची माहिती मिळताच सांगली आणि मिरजमधील अग्निशमन दलाच्या आठ गाड्या तातडीने घटनास्थळी दाखल झाल्या. एकाच वेळी सर्व गाड्यांमधील पाण्याच्या फवार्याने आग आटोक्यात आणण्याचे प्रयत्न सुरू होते. परंतु तरीदेखील आग आटोक्यात आणण्यासाठी दोन तासाहून अधिक काळ अग्निशमन विभागाला लागला.
- घटनास्थळी पोलिसांचा लाठीमार
आगीची घटना समजतात परिसरातील तसेच मिरज शहरातील नागरिकांनी मोठ्या प्रमाणात घटनास्थळी गर्दी केली होती. पोलिसांनी वारंवार सूचना करून देखील घटनास्थळावरून नागरिकांचा जमाव न हटल्याने पोलिसांना सौम्य लाठीमार करावा लागला.
