कुपवाड प्रतिनिधी / सांगलीतील बळवलेली गुन्हेगारी पंधरा-वीस दिवसात शांत होताच पुन्हा एकदा गुन्हेगारांनी डोके वर काढले आहे. पोलिसांच्या रेकॉर्डवरील गुन्हेगारी क्षेत्रातील सराईत असणारा गुंड सच्या उर्फ सचिन टारझन याच्यावरच आज (सोमवारी) सकाळी जीवघेणा हल्ला झाल्याने सर्वत्र एकच खळबळ उडाली आहे.
सचिन टारझन याच्यावर आज सकाळी ७:०० च्या सुमारास धारदार शस्त्राने अहील्यानगर परिसरात खुनी हल्ला करण्यात आला. दरम्यान गंभीर जखमी अवस्थेत त्याला सांगलीच्या शासकीय रुग्णालयात दाखल करण्यात आले आहे.
सच्या टारझन हा पोलिसांच्या रेकॉर्डवरील रेड यादीतील गुंड आहे. एका खुनाच्या गुन्ह्यात तो सध्या जामिनावर बाहेर आहे.आज सकाळी सातच्या सुमारास काही अज्ञात तरुण अचानक त्याच्या घरात घुसले. त्या तरुणांनी सच्यावर धारदार हत्याराने हल्ला चढवला. काही मिनिटातच हल्ला करून ते परागंदा झाले. गंभीर जखमी अवस्थेत सच्या टारझन याला सांगलीच्या पद्मभूषण वसंतरावदादा पाटील शासकीय रुग्णालय व वैद्यकीय महाविद्यालय येथे दाखल करण्यात आले आहे.
सांगलीत एका पक्षाच्या कार्यकर्त्यावरती गोळीबार करून त्याची हत्या करण्यात आली होती. त्यात सचिन टारझनचा सहभाग होता अशी सर्वत्र चर्चा होती. पण पोलिस तपासात तसे निष्पन्न झाले नाही. सच्या टारझनवर खुनी हल्ला झाल्याने शहरात खळबळ उडाली आहे. कुपवाड पोलिसांनी घटनास्थळी धाव घेतली आहे. पोलिस हल्लेखोरांचा शोध घेत आहेत. दरम्यान सच्या टारझनवरील हल्ल्याचे नेमके कारण अद्याप स्पष्ट झाले नाही.
