मिरज : खबऱ्या प्रतिनिधी : मिरज तालुक्यातील मालगाव येथे झालेल्या मोटरसायकल अपघातात सामाजिक कार्यकर्ते शितल बाबासो जत्ते (वय ४७) हे जागीच ठार झाले. शनिवारी सायंकाळी सात वाजण्याच्या सुमारास मालगाव लक्ष्मीनगर येथे नव्याने झालेल्या राष्ट्रीय महामार्गावर पश्चिम बाजूस हा अपघात झाला. याबाबत मयत शितल यांचे भाऊ संतोष चारुदत्त जत्ते (वय ४३) यांनी मिरज ग्रामीण पोलिसात फिर्याद दिली असून, सुशांत रावसाहेब तारदाळे उर्फ छोटू पुजारी (रा. मलगाव) यांच्यावर गुन्हा दाखल झाला आहे.
सुशांत तारदाळे उर्फ छोटू पुजारी हा मोपेड ॲक्टिवा मोटारसायकल (एमएच-१०-सीई-4292) वरून शितल जत्ते यांना सोबत घेऊन जात होता. मालगाव गावच्या हद्दीत लक्ष्मीनगर येथे नव्याने झालेल्या राष्ट्रीय महामार्गावरून छोटू हा भरधाव वेगात मोटारसायकल चालवत होता. मोटरसायकल महामार्गाच्या पश्चिम बाजूस आली असता तेथे असलेल्या मातीच्या ढिगारावर चढली. त्यामुळे पाठीमागे बसलेले शितल जत्ते हे खाली पडून त्यांच्या डोक्याला मोठा दगड लागला. यामध्ये प्रचंड रक्तस्त्राव झाल्याने जत्ते यांचा जागीच मृत्यू झाला. अपघातानंतर छोटू याने जखमी जत्ते यांना रुग्णालयात दाखल करायचे सोडून तेथून पळ काढला. अपघाताची माहिती मिळताच त्यांच्या भावाने घटनास्थळी धाव घेतली होती. याबाबत त्यांनी मिरज ग्रामीण पोलिसात तक्रार दिली असून, मोटरसायकलस्वार छोटू पुजारी याच्यावर गुन्हा दाखल झाला आहे.
