सांगली : खबऱ्या प्रतिनिधी ; सांगली जिल्हा प्राथमिक शिक्षक बँकेचे निवडणुकीचे रण तापू लागले आहे. २१ जागांसाठी १३६ जणांचे अर्ज वैध ठरले आहेत. सत्ताधारी शिक्षक समितीला आव्हान देण्यासाठी शिक्षक संघाचे संभाजी थोरात गट तसेच शि.द. पाटील गट आणि इतर काही संघटना स्वाभिमानी शिक्षक मंडळाच्या माध्यमातून एकत्र आल्या आहेत. दोघांचाही या निवडणुकीत कस लागणार आहे.
सांगली जिल्हा प्राथमिक शिक्षक बँकेची निवडणूक ३ जुलै रोजी होणार आहे. या निवडणुकीसाठी अर्ज दाखल करण्याची मुदत संपली असून छाननी अखेर २१ जागांसाठी १३६ जणांचे अर्ज वैध ठरले आहेत. २० जूनपर्यंत उमेदवारी माघार घेण्याची मुदत आहे. त्यानंतर निवडणुकीचे चित्र स्पष्ट होईल. मात्र, शिक्षक समितीच्या गेल्या अकरा वर्षातील सत्तेला उलथवून टाकण्यासाठी विविध संघटनानी एकत्र येऊन स्वाभिमानी शिक्षक मंडळाच्या माध्यमातून आव्हान दिले आहे.
आरोप-प्रत्यारोपांची राळ…
शिक्षक बँकेची निवडणूक गेल्या महिन्यात जाहीर झाली असली तरी दोन महिन्यापूर्वी पासूनच सत्ताधारी व विरोधकांमध्ये आरोप-प्रत्यारोप सुरू झाले आहेत. विश्वनाथ मिरजकर यांच्या नेतृत्वाखाली निवडणुकीत उतरलेल्या शिक्षक समितीने पुन्हा एकदा बँकेची सत्ता मिळवण्यासाठी प्रयत्न सुरू केले आहेत. फेब्रुवारीत शिक्षक समितीने बँकेचे कर्जाचे व्याजदर कमी केले होते. त्यानंतर काही कारणावरून व्याजदर एक अंकी करून सभासदांना खूश करण्याचा प्रयत्न केला. सात वर्षात सहा वेळा व्याजदरात कपात केल्याचा दावा समितीने केला होता. त्याचवेळी लाभांश वाढवत नेल्याचा दावा केला आहे.
तर शिक्षक संघाने मात्र त्यांच्या काळात केवळ व्याज वाढवल्याचा आरोपही केला होता. दुसरीकडे शिक्षक संघाने समितीचे आरोप खोडून काढत गेल्या अकरा वर्षे शिक्षक बँकेत सत्ताधाऱ्यांनी मनमानी कारभार केल्याचा आरोप केला आहे. निवडणुकीच्या तोंडावर व्याजदरात कपात आणि उच्चांकी लाभांशाची घोषणा केली आहे. मात्र या गोष्टी म्हणजे निव्वळ सभासदांची फसवणूक असल्याचा आरोप शिक्षक संघाने केला आहे. संगणक देखभाल दुरुस्ती, नोकर भरती, पोलीस पगार यावर सत्ताधाऱ्यांनी कोट्यवधी रुपयांची उधळण केल्याचा आरोपही शिक्षक संघाने केला होता.
